Polıtsııa Denıs Tenniń kóliginen urlanǵan aınany ótkizý josparyn ashty
QR Іshki ister mınıstriniń orynbasary Rashıd Jaqypovtyń sózine qaraǵanda, qazirgi kezde Denıs Tenniń ólimi boıynsha kúdiktiler aınany kimderge ótkizbekshi bolǵany anyqtalǵan jáne olardan jaýap alynǵan.
«Olarǵa qatysty tıisti sharalar júrgizilip jatyr», - dep naqtylady vıtse-mınıstr.
Budan bólek ol kúdikke ilingen Nuraly Qııasov pen Arman Qudaıbergenovti ustaýdyń mán-jaıyn ashyp aıtpady.
«Bizdiń jumysymyzdyń barlyq ádisterin ashyp aıta almaımyn. Biraq ta bul ádister óz tıimdiligin kórsetti jáne aıyptylardy qysqa merzimde anyqtaýǵa múmkindik berdi», - dep qosty R. Jaqypov.
Aıta ketsek, Qazaqstandyq mánerlep syrǵanaýshy Denıs Ten 19 shilde kúni pyshaq jaraqatynan qaza bolǵan edi. Oqıǵa Qurmanǵazy men Baıseıitova kósheleriniń qıylysynda, 19 shildede túski saǵat 15:00 shamasynda bolǵan.
Sportshy kóliginiń aınasyn urlamaq bolǵan eki adamnyń ústinen túsken. Arada bastalǵan janjaldyń saldarynan urylar Denıs Tenge pyshaq suǵyp alǵan.
Ol oń jaq sanynyń joǵary tusynan jaraqat aldy. 25 jastaǵy Ten úsh lıtr qan joǵaltyp, aýrýhanaǵa óte aýyr jaǵdaıda jetkizildi.
Biraq Almaty qalalyq Densaýlyq saqtaý basqarmasynyń basshysy Serikbol Mýsınov qosymsha qan qajet emestigin jáne resýrstar jetkilikti ekendigin málim etken bolatyn.
2,5 saǵatqa jalǵasqan reanımatsııalyq sharalarǵa qaramastan, aýrýhana dárigerleri onyń ómirine arasha túse almady. Saǵat 17.30-da Olımpıada júldegeri qaıtys boldy.
Adam óltirý babymen qylmystyq is qozǵaldy.
Belgili bolǵandaı, sportshynyń ólimine qatysy bar eki kúdiktiniń biri ustalyp, ol qylmysyn moıyndady.
Ekinshi kúdikti - 1994 jyly týǵan Qyzylorda oblysy, Qarmaqshy aýdany, Aqaı aýylynyń týmasy Arman Qudaıbergenovke izdeý jarııalandy.
Sondaı-aq, Denıs Tenniń ólimine kúdikti Nuraly Qııasov kúzetpen Almaly aýdandyq sotyna jetkizilgen.
Al Denıs Tenniń ólimi boıynsha kúdikti ekinshi adam Arman Qudaıbergenov ustaldy.
