Polshada ótken onlaın-konferentsııada Qazaqstannyń jetistikteri talqylandy
Mereıtoıǵa qatysty is-sharany Qazaqstan Elshiligi jáne Polshanyń Mıhal Boım atyndaǵy Azııalyq jáne jahandyq zertteýler ınstıtýty birlese uıymdastyrdy.
Konferentsııa spıkerleriniń quramyna Polsha Prezıdenti (1995-2005 jj.) Aleksandr Kvasnevskıı, Qazaqstan SІM janyndaǵy Syrtqy saıası zertteýler ınstıtýtynyń Basqarma tóraǵasy Bolat Nurǵalıev jáne Halyqaralyq uıymdar jáne ıntegratsııalyq úderister basqarmasynyń basshysy Mádına Jarbosynova, «Polpharma tobynyń» prezıdenti – Qazaqstannyń Polshadaǵy Qurmetti konsýly Ejı Starak, «Selena tobynyń» negizin qalaýshy Kshıshtof Domaretskıı, sondaı-aq Qazaqstan SІM Investıtsııalar komıtetiniń tóraǵasy mindetin atqarýshy Ardaq Zebeshev sııaqty kórnekti saıasatkerler men bıznes qurylymdardyń basshylary kirdi.
Sonymen qatar, semınar jumysyna Qazaqstan, Polsha jáne Eýropalyq odaqtyń salalyq memlekettik organdarynyń jáne saraptamalyq-taldaý toptarynyń ókilderi qatysty.
Óz sózinde Qazaqstan Elshisi Álim Qırabaev aýdıtorııany memleketimizdiń negizgi jetistikterimen tanystyryp, onyń ıadrolyq qarýǵa qarsy qozǵalys protsesine qosqan qomaqty úlesine jáne bitimgershilik bastamalaryna erekshe kóńil aýdardy.
Qatysýshylardyń nazaryna sondaı-aq Prezıdent Qasym-Jomart Toqaevtyń bastamasymen Qazaqstanda júrgizilip jatqan saıası jáne áleýmettik-ekonomıkalyq ózgerister týraly aqparat usynyldy.
A, Kvasnevskıı óz sózinde Qazaqstannyń álemniń kóptegen memleketteri úshin úlgi bola alatyn jaýapty, beıbitsúıgish saıasatyna jáne ulttyq kelisimine nazar aýdara otyryp, tarıhı turǵydan alǵanda qysqa merzimde elimizdiń qol jetkizgen tabystaryn atap ótti.
Oraıly sátti paıdalana otyryp, ol Elbasy Nursultan Nazarbaev pen Prezıdent Qasym-Jomart Toqaevqa jáne barsha qazaqstandyqtarǵa táýelsizdiktiń 30-jyldyǵyna oraı óziniń quttyqtaýlary men izgi tilekterin jetkizýdi surady.
Semınar alańynda táýelsizdik alǵannan beri Qazaqstanda júrgizilgen negizgi reformalardyń nátıjeleri, pandemııadan keıingi kezeńde eki el aldynda turǵan ortaq syn-qaterler, Qazaqstannyń Polshamen jáne Eýroodaqpen yntymaqtastyqtyń ózge de ózekti máselelerdi talqylandy.
Pikirtalas barysynda qatysýshylar Qazaqstan Respýblıkasynyń saıası jáne qoǵamdyq-ekonomıkalyq damýy, syrtqy saıasatyna qatysty saraptamalyq pikirlermen almasyp, qundy praktıkalyq usynystar berdi.
