Podgorıtsada Qazaqstan men Chernogorııa arasyndaǵy tikeleı áýe qatynasynyń ashylý rásimi ótkizildi

PODGORITsA. QazAqparat - QR Elshisi Tólejan Barlybaev Qazaqstannan Chernogorııaǵa tikeleı áýe reısteriniń ashylý saltanatyna jáne Podgorıtsa qalasynda ótken baspasóz máslıhatyna qatysty, dep habarlaıdy QazAqparat QR SІM resmı saıtyna silteme jasap.

Rásimde sóz sóılegen Qazaqstannyń Chernogorııadaǵy, Horvatııadaǵy jáne Bosnııa jáne Gertsegovınadaǵy Elshisi Nur-Sultan men Podgorıtsa arasynda tikeleı áýe qatynasyn ornatý ekijaqty qarym-qatynastardy damytýǵa, týrıstik, iskerlik jáne mádenı almasýlardy keńeıtýge qyzmet etetinin málimdedi. 2021 jyldyń sáýirinde konsýltatsııalar barysynda qol qoıylǵan 2021–2023 jyldarǵa arnalǵan Qazaqstan men Chernogorııa syrtqy saıası vedomstvalary arasyndaǵy yntymaqtastyq baǵdarlamasynyń, sondaı-aq Chernogorııa tarapynyń qazaqstandyqtar úshin vızasyz rejım (jyl saıyn 15 sáýir men 15 qazan aralyǵynda) usyný týraly sheshiminiń mańyzdylyǵy atap ótildi.

Dıplomat eki el arasyndaǵy qatynastardyń ornaǵanyna 15 jyl tolýyna oraı, Podgorıtsada 2021 jyldyń 6 shildesinde ótkizilýi josparlanǵan Qazaqstannyń Qurmetti konsýldyǵy keńsesiniń ashylýyn jarııalady. Mekeme Chernogorııadaǵy qazaqstandyq týrısterge jedel qoldaý kórsetedi, sondaı-aq týrıstik, iskerlik jáne mádenı baılanystardy damytýǵa járdemdesedi. Onyń ókildigi chernogorııalyq jaǵalaýynda – Býdva qalasynda da ashylady.

Qazirgi ýaqytta «Air Astana» áýe kompanııasynyń Chernogorııa astanasyna reısteri Nur-Sultan qalasynan sársenbi jáne senbi kúnderi, Almaty qalasynan beısenbi jáne jeksenbi kúnderi oryndalady. 2021 jyldyń 21 maýsymynan bastap reıster kún saıyn Nur-Sultannan dúısenbi jáne Almatydan seısenbi men juma kúnderi ushyp shyǵýlardy qosa otyryp oryndalatyn bolady.