Plastıkalyq hırýrgııa: nelikten qazaqstandyqtar Koreıany tańdaıdy
Seýldegi zamanaýı sulýlyqtyń eń sándi epıtsentri – Gangnamda qazaqstandyqtar plastıkalyq hırýrgııa boıynsha jetekshi ortalyqtyń VIP patsıentteri bolyp sanalady. Al, Ońtústik Koreıanyń sulýlyq standarty álemge belgili. Jergilikti plastıkalyq hırýrgter joǵary biliktiliginiń arqasynda eń myqty mamandar qataryna jatady. Bul sala elge mıllıardtaǵan tabys ákelip otyr. Kazinform agenttiginiń tilshisi Dáýlet Іztileý Koreıanyń tanymal plastıkalyq hırýrgi Chjý Kvonmen áńgimelesip qaıtqan edi.
- Doktor Kvon, Koreıadaǵy plastıkalyq hırýrgııa sheteldikterdi nesimen qyzyqtyrady?
- Koreıa árqashan óziniń joǵary sulýlyq standarttarymen tanymal jáne plastıkalyq hırýrgııanyń ortalyǵy deýge bolady. Medıtsınalyq týrızm jáne plastıkalyq hırýrgııa koreılerdiń ózderi úshin ǵana emes, kóptegen sheteldik qonaqtar úshin de basty tartymdy faktorǵa aınaldy. Álde de kóptegen sheteldik Koreıany óz densaýlyǵymen aınalysyp qana qoımaı, kóńil kóterý úshin tańdaıdy.
Alaıda, ártúrli kontınentter men elderdiń ózindik erekshe suranystary bar. Mysaly, AQSh azamattary úshin semizdik problemasy ózekti. Olar artyq salmaqtan arylý úshin keledi. Azııa elderinde qartaıýǵa qarsy plastıkalyq otaǵa suranys joǵary. Ár patsıenttiń óz qalaýy bar.
- Búginde qandaı plastıkalyq operatsııalar eń tanymal bolyp sanalady?
- Buryn muryn men kózge operatsııa sheteldikter arasynda da, koreılerde de suranysqa ıe boldy. Qazir adamdar uzaq ómir súrip, jastyqty saqtaǵysy keletindikten, lıftıng jáne betti jasartý sııaqty, ıaǵnı qartaıýǵa qarsy operatsııalar joǵary suranysta. Kóbi mundaı protsedýralarǵa 40 jasynda júginedi. Birde 80 jastan asqan patsıent bet álpetin tolyq kóterý úshin keldi.
Bizdiń klınıkada kez kelgen plastıkalyq otany jasaý múmkindigi bar. Bet operatsııasynan deneni túzetýge deıin, sonyń ishinde kontýrlyq plastıka da jasalady. Óıtkeni, bizde bir dáriger emes, birneshe joǵary mamandandyrylǵan maman jumys isteıdi. Olar blefaroplastıka da, rınoplastıka da jasaıdy.
Plastıkalyq hırýrgııadan basqa, biz tyrtyqtardy emdeýge arnalǵan diń jasýshalarynyń protsedýralaryn usynamyz. Ol ımmýnıtetti yntalandyrý úshin kóktamyr ishine engiziledi.
- Qandaı operatsııalar eń kúrdeli bolyp sanalady jáne qansha ýaqyt alady?
- Plastıkalyq hırýrgııada qartaıýǵa qarsy operatsııalar kúrdeli. Bettiń bir bóligin qarapaıym tartýdan aıyrmashylyǵy – ol protsedýralar mańdaı men moıyndy qosa alǵanda, birneshe aımaqqa keshendi áser etýdi qajet etedi. Mundaı operatsııalar aıtarlyqtaı ýaqytty alady jáne dáriger kúni boıy operatsııa bólmesinde bolady. Ár patsıentke bir kún beriledi. Sol sııaqty, dene operatsııalary da kóp ýaqytty qajet etedi. Ádette, sheteldik azamattar barlyq operatsııany bir saparda jasaǵysy keledi. Keıbir naýqastar protsedýralardy eki bólikke bólýdi jón kóredi, bir aptany betke, al bir aptadan keıingi ýaqytyn denege arnaıdy.
- Plastıkalyq otalardyń quny nege baılanysty?
- Operatsııalardyń ártúrli ádisteri bar. Mysaly, betti kóterý operatsııasynda terini ishinara ashatyn ádis bar jáne búkil protsess 2-3 saǵatty alady. Degenmen, bul áser qysqa merzimdi bolýy múmkin. Sonymen qatar, 20-30 jylǵa jasarýǵa qol jetkizýge baǵyttalǵan, betti tolyq tartýdy qajet etetin taǵy bir ádis bar. Bul – estetıkalyq ádemi nátıjege jetý úshin kóp ýaqytty qajet etetin protsedýra, ıaǵnı operatsııanyń baǵasy dárigerge, onyń tájirıbesine jáne ol qoldanatyn tehnologııaǵa baılanysty.
- Er adamdar plastıkalyq ota jasatýǵa júgine me?
- Shyn máninde, qartaıýǵa qarsy operatsııalar úrdisi artyp, er adamdarǵa jetti. Buryn olar muryndary men kózderin jıi túzetpeıtin, biraq qazir jas kóringisi keletinder kóp.
- Koreıalyq jasóspirimder týraly ne aıtýǵa bolady? Oqýshylar shynymen plastıkalyq hırýrgııaǵa júgine me?
- Bizde jasóspirimderge operatsııa jasaýǵa resmı tyıym joq. Biraq biz ol qadamǵa barmaımyz. Operatsııany mektepti bitirgennen keıin, ýnıversıtetke túskende, ıaǵnı dene músheleri tolyq qalyptasqanda jasaǵan abzal. Jastarǵa 20 jastan keıin júginýge keńes beremiz.
- Sizde sátsiz plastıkalyq operatsııalar boldy ma?
- Máselen, patsıent 20 jylǵa jasarǵysy keldi, biraq nátıje 15 jyldyq bolyp shyqty. Jalpy ota sátti ótti, degenmen patsıentke taǵy bir márte jasaý kerek sııaqty. Mundaı jaǵdaılar bolyp turady. Árıne, klınıka munyń bárine túsinistikpen qaraıdy jáne biz taǵy bir amalyn jasaýǵa bola ma, joq pa, sony qarastyramyz. Munyń bári naýqastyń qalaýyna baılanysty.
- Plastıkalyq otadan keıin patsıenttiń qalpyna kelýi qansha ýaqytqa sozylady?
- Kez kelgen operatsııadan soń eki aptadan keıin Koreıadan ushyp kete alasyz. Osy ýaqytqa deıin barlyq tigister alynyp tastalyp, sodan soń tekserýden ótedi. Tolyq qalyptasý úshin 3 aıdan 6 aıǵa deıin, keıde bir jylǵa deıin kútý kerek. Bul – dene men betke jasalǵan operatsııalarǵa qatysty tártip.
- Tabıǵı sulýlyqty saqtaý kerek dep, bul medıtsınalyq protsedýraǵa qarsy shyǵatyn bar. Buǵan qatysty sizdiń pikirińiz...
- Tipti, Koreıanyń ózinde plastıkalyq hırýrgııaǵa qarsy adam óte kóp. Biraq meniń oıymsha, bul jerde ortasyn tańdaý mańyzdy. Ádette, qarsylar – ózderine senimdi adamdar. Sondyqtan olar ózderiniń áldebir jerin túzetýdi qajet etpeıdi.
- Qandaı plastıkalyq otalar sizdiń esińizde qaldy?
- Qaıyrymdylyq sharasy arqyly jasalǵan operatsııalar. Bizdiń ortalyqqa órtten zardap shekken, ıaǵnı betteri kúıip qalǵan balalar keldi. Turmystyq zorlyq-zombylyqtan zardap shekken balalar da boldy. Bir balaǵa ákesi qyshqyl shashyp jibergen. Árıne, olardyń betterin qaıtarý múmkin emes, biraq qoldan kelgendi jasadyq.
- Áńgimeńizge rahmet.
