Planshet ustaǵan zamanda dástúrdi kitaptan oqysyn - Esbolat Aıdabosyn
Onyń ishinde tanymal jýrnalıst, "Altyn qalam", "Altyn tobylǵy" syndy birneshe respýblıkalyq baıqaýlardyń ıegeri Esbolat Aıdabosynnyń da kitaby bar. Avtordyń "Súlikqara" atty jınaǵy onyń alǵashqy týyndysy. Sóılem quraýda súrinbeıtin, ózindik stıli bar avtor bul kitapta maqsatty túrde, keler urpaq úshin jazylǵan shyǵarmalar bar ekenin jetkizdi. 
"Súlikqara"- tuńǵysh kitabym. Men 2012 jyldan beri áńgime-hıkaıattar jazyp kelemin. Munda sol áńgimeler men hıkaıattar toptastyrylǵan. Máselen "Súlikqara" shyǵarmasy balalarǵa arnalǵan. Shynaıy ómirmen baılanysqan. Ol jerde balalyq bar, tazalyq bar. Bir jyldary "Daraboz" degen realıtı-shoý baǵdarlamasyn kórip otyrsam, oǵan qatysýshy jigitter attyń miner jaǵy men qamshylar jaǵyn ajyrata almaı jatty. Maǵan sol kezde oı keldi. Biz taıǵa minip, báıgege qatysqan urpaqpyz ǵoı, osyny keler urpaqqa jazyp qaldyrý negizgi maqsatym boldy. Qazir attyń ornyna mashına minip, qamshynyń ornyna aıfon, planshet ustaǵan zamanda olar dástúrdi kitaptan oqysyn degen oımen jazdym. Máselen "Qamshy ustar" atty shyǵarmamda qamshynyń jasalý tehnologııasy, "Qyzyl saqada" asyq oıyny jaıly jazylǵan. Árbir jazýshy balalar ádebıetine qalam tartý kerek dep bilemin. Óıtkeni búgin balalar ádebıetin oqyp óspegen urpaq,úlken romandardy, tarıhı dúnıelerdi oqymaıdy. Sondyqtan biz osy bastan óz oqyrmandarymyzdy tárbıeleý kerekpiz", - deıdi Esbolat Aıdabosyn.
Sondaı-aq "Jetisý jazýshylarynyń antologııasy" jaryq kórdi. Tuńǵysh ret oqyrmanǵa jol tartqan jınaqtyń proza janry boıynsha qurastyrýshy Esbolat Aıdabosyn. Antologııaǵa 20-45 jas aralyǵyndaǵy jetisýlyq qalamgerlerdiń shyǵarmalary toptastyrylǵan. Proza janry boıynsha 34 avtordyń shyǵarmasy kitapqa engen.
"Jetisý jazýshylarynyń antologııasyn" jyl saıyn kezeń-kezeńimen shyǵaryp otyrý josparymyzda bar», - deıdi E.Aıdabosyn. 
Sondaı-aq bul keshte, E.Júnis, J. Nemerebaev, N. Bektemirova, sondaı-aq "Habar" telearnasynyń Almaty oblysyndaǵy menshikti tilshisi Ádilhan Saharıevtiń de kitaptarynyń tusaýy kesildi.
Jalpy, oblys ákiminiń qoldaýymen 2006-2016 jyldar aralyǵynda «Mádenı mura» baǵdarlamasynyń aıasynda 327 avtordyń 402 mln. 597 myń teńgege 281 838 kitaby shyǵaryldy.
