«Pixar» mýltfılmderiniń keıipkerleri taǵy da qazaqsha sóıledi

ALMATY. QazAqparat - Gollıvýd kartınalaryn qazaq tilinde sapaly dybystaý jumystarynyń basty uıymdastyrýshysy «Bolashaq» qaýymdastyǵy kishkentaı kórermenderge taǵy da tosynsyı ázirledi. 23 qarashadan bastap, «Kokonyń qupııasy» mýltfılmi qazaq tilinde kórsetile bastady, dep habarlaıdy QazAqparat tilshisi. 

Mýltfılm dýlblıajynyń rejısseri Shah-Murat Ordabaev kartınany qazaq tilinde sóıletý óte qıyn bolǵanyn aıtty.

«Kokonyń qupııasy» - meniń rejısser retindegi úshinshi jobam. Akter retindegi 11-shi rólim, alǵashqy anımatsııalyq fılmim. Ol buǵan deıingi jobalarymnyń ishindegi eń qıyny boldy. Kartınanyń qıyndyǵy - onyń mýzykalyq tustarynda. Basty qaharmandar ándi ǵajap oryndaǵan, sondyqtan bizge de olardan kem túspeý kerek boldy. Mýltfılm arqyly halyqtardyń uqsastyǵyn baıqadym. Fılmniń basty ıdeıasy - ata-babańdy umytpaý, otbasyn súıý. Sózimdi qorytyndylaı kele «Kokonyń qupııasyn» otbasylyq meıirimdi fılm ekenin aıtqym keledi. Ásirese, qazaq tilindegi nusqasyn otbasymen birge kórýge keńes beremin», - dedi dýblıaj rejısseri Shah-Murat Ordabaev.

Dýblıajǵa barlyǵy 35 akter qatysqan. Basty róldegi keıipkerlerdi Aqarys Áshimhan (Mıgel), Oljas Jaqypbek (Ektor), Saılaý Qamıev jáne Nurken Óteýilov (Ernesto De La Krýz) syndy akterler dybystaǵan. Mátindi aýdarǵan - Ásel Mamyrova.

Joba jetekshileri eń basty qıyndyq - 12 jastaǵy Mıgel esimdi basty keıipkerdi dybystaý bolǵan. Buǵan deıin Maýglıdi qazaqsha dybystaǵan Aqarys Áshimhan baıqaýǵa túsken 25 balanyń ishinen Mıgeldiń daýysyn salýǵa laıyq dep tanylǵan.

«Dýblıaj barysynda qıyndyqtar kóp boldy. Meksıkalyqtar óte emotsııaǵa baı halyq. Sondyqtan, Mıgeldiń kóńil-kúıiniń qubylǵanyn kórsetý kúrdeli boldy», - dedi Mıgeldiń anasyn dybystaǵan aktrısa Aınur Bermuhambetova.