Pırotehnıka saýdasy: Shymkentte 900 myń teńgeden astam aıyppul salyndy

ShYMKENT. QazAqparat – Shymkentte úsh táýlik ishinde 90 keli sertıfıkattalmaǵan pırotehnıka buıymdary tárkilendi. Bul týraly qalalyq polıtsııa departamenti ákimshilik polıtsııa basqarmasynyń bastyǵy Erǵalı Súleımenov málimdedi, dep habarlaıdy QazAqparat tilshisi.

Polıtsııa departamentiniń qyzmetkerleri men TJD mamandary kúndelikti reıdtik is-sharalar júrgizip jatyr. Jalpy, 3 kún ishinde zańsyz saýdaǵa shyǵarylǵan sertıfıkaty joq 90 keli pırotehnıka buıymdary tárkilendi. QR Ákimshilik quqyq buzýshylyq Kodeksiniń 196-baby boıynsha 12 ákimshilik hattama toltyrylyp, 918 900 teńge kóleminde aıyppul salynǵan.

«Respýblıka kóleminde 25 jeltoqsan men 3 qańtar aralyǵynda «Pırotehnıka» is-sharasy ótkizilip jatyr. Basty maqsat – mereke kúnderi qoǵamdyq qaýipsizdikti qamtamasyz etý, balalar arasyndaǵy jaraqat alýdy boldyrmaý, oqys oqıǵalardyń aldyn alý. Polıtsııa departamenti tarapanyn 110 qyzmetkerden 19 top qurylyp, TJD qyzmetkerlerimen birlesip kúndelikti reıdtik sharalar júrgizilip keledi», - dedi Erǵalı Súleımenov.

Al, Shymkent qalasy TJD bastyǵynyń orynbasary Amanbek Beısenbaev reıdtik is-sharalar kezinde 4 myńnan astam azamatqa profılaktıkalyq túsindirý jumystary júrgizilip, jeke kásipkerlerge nusqaýlyqtar men jadnamalar taratylǵanyn atap ótti.

Ashyq kózderden alynǵan foto