PІB Medortalyǵynyń Aqtóbedegi kúnderi: 30 operatsııa jasalyp, 150-den astam keńes beriledi
Bul aktsııa óńirlerdegi densaýlyq saqtaý salasyn damytý, otandyq medıtsınanyń deńgeıin kóterý, halyqqa joǵary sapaly kómek kórsetý úshin qolǵa alynyp otyr.
Qazirgi tańda Astanadaǵy Medıtsınalyq ortalyq aýrýhana men Almatydaǵy Ortalyq klınıkalyq aýrýhananyń bilikti neırohırýrg, onkolog, genetık, kardıohırýrg mamandarynan jasaqtalǵan komanda aımaq halqyna praktıkalyq jáne konsýltatsııalyq kómek kórsetip jatyr. Olar sheberlik sabaqtaryn ótkizedi, kúrdeli patsıentterdi dıagnostıkalaý men emdeýdiń jańa tehnologııalary týraly áńgimeleıdi. Jalpy, PІB Medortalyǵynyń kúnderi aıasynda 150-den astam konsýltatsııa júrgizilip, 30 operatsııa jasaý josparlanǵan.
«Memleket basshysy elimizde densaýlyq saqtaýdy damytýdyń negizgi baǵyt-baǵdaryn aıqyndap berdi, ol úshin elimizdiń ár azamaty ozyq tehnologııa men álemdik standartqa saı sapaly medıtsınalyq kómekpen qamtylýǵa tıis. Úzdik álemdik tájirıbeni jáne tehnologııalardy paıdalanyp júrgen Medıtsınalyq ortalyq ujymy bul jetistigin bólisýge qashanda daıyn. Óńirlerdegi áriptesterimizben birlesip túrli jobalardy iske asyrý, dıagnostıka men emdeýdiń jańa halyqaralyq hattamalaryn engizý jóninde tájirıbe almasý, dárigerlerdiń taǵylymdamalary týraly kelisimge qol jetkizdik. Munyń bári óńir halqynyń densaýlyǵyn jaqsartý jolynda Aqtóbe oblysy ákimdigimen Yntymaqtastyq kókjıegin keńeıtýge baǵyttalǵan memorandýmǵa engizildi», - deıdi QR PІB Medıtsınalyq ortalyǵynyń basshysy Alekseı TsOI.
Aqtóbe oblysyndaǵy aýqymdy sharaǵa PІB Sanıtarlyq-epıdeomologııalyq saraptama ortalyǵy men «Qarlyǵash» balabaqshasynyń mamandary da belsene aralasyp, óz baǵyttary boıynsha sheberlik sabaqtaryn ótkizedi, basqa da is-sharalarǵa muryndyq bolady.
Atap aıtqanda, PІB Sanıtarlyq-epıdemıologııalyq saraptama ortalyǵynyń ókili sanıtarlyq-epıdemıologııalyq saýlyqty qamtamasyz etý maqsatynda júrgiziletin zamanaýı zerthanalyq zertteýlerdiń ózekti máseleleri boıynsha jergilikti «Ulttyq saraptama ortalyǵy» bazasynda trenıng uıymdastyrdy.
Rústem Alıasqarov Ortalyqtyń qyzmetimen tanystyryp, sanıtarlyq-epıdemıologııalyq qaýipsizdikti qamtamasyz etý salasyndaǵy normatıvtik talaptarǵa sáıkes júrgizilip jatqan zerthanalyq zertteýler týraly áńgimeledi.
Aqtóbe oblysy boıynsha Ulttyq saraptama ortalyǵynyń dırektory Saǵyntaı Gelmanov USO zerthanasynyń qyzmeti týraly aıtyp berdi.
Eki zerthananyń mamandaryna praktıkalyq máselelerdi talqylap, tájirıbe almasýǵa biregeı múmkindik berildi.
Trenıng aıasynda, Ortalyqtyń dırektory Sáýle Sharıpova tamaq ónerkásibi jáne qoǵamdyq tamaqtaný obektileriniń ókilderi úshin: úzdik halyqaralyq tájirıbeler (GHP, GMP) jáne NASSR qaǵıdattary negizinde tamaq qaýipsizdigin qamtamasyz etý. Azyq-túlik kásiporyndarynda zerthanalyq baqylaýdyń tıimdiligin arttyrý boıynsha oqý ótkizdi.
Trenıng Alımentarıýs Kodeksiniń azyq-túlik qaýipsizdigin qamtamasyz etý jónindegi halyqaralyq baǵdarlamalardyń usynymdary negizinde ázirlendi.
Trenıngte qaýipti faktorlardy anyqtaý, tamaq ónimderin óndirý/daıyndaý kezindegi táýekelderdi taldaý jáne baqylaýdyń synı kezeńderin anyqtaýmen jáne táýekelderdi basqarý úshin qandaı monıtorıng jasaý kerektigin belgileı otyryp, NASSR quraldaryn praktıkada qoldaný boıynsha sheberlik saǵattary ótkizildi.
Trenıngke tamaq ónerkásibi jáne qoǵamdyq tamaqtaný obektilerinen 38 bıznes ókilderi jáne Aqtóbe oblysynyń UEO mamandary qatysty.
