PhD qorǵaýǵa qoıylatyn talapty tómendetpeý kerek – Máýlen Áshimbaev
ASTANA. KAZINFORM – Búgin Senat otyrysynda ǵylym jáne bilim berýdi jetildirýge arnalǵan zań qaraldy. Sonyń barysynda Scopus bazasyna enetin halyqaralyq ǵylymı jýrnaldarǵa maqala jarııalaý týraly talap doktorlyq dıssertatsııa qorǵaýǵa kedergi keltiretini jóninde otandyq ǵalymdardyń pikiri nazarǵa alyndy. Ǵylym jáne joǵary bilim vıtse-mınıstri Darhan Ahmed-Zakı bul baǵytta jumystar qolǵa alynǵanyn atap ótti.
Osyǵan baılanysty Senat tóraǵasy Máýlen Áshimbaev jýrnaldarǵa qatysty pikirler oryndy jáne ǵalymdarymyz úshin sheteldik basylymdarǵa materıal jarııalaý ońaı emes ekenin tilge tıek etti. Sondaı-aq ol máseleni osy jaǵynan qarap, jalpy ǵylymǵa qoıylatyn talapty tómendetpeý kerek ekenin aıtty.
«Ǵylym jan-jaqty zerttelgen qadamdy talap etedi. Sondyqtan PhD-di qorǵaýǵa arnalǵan krıterıılerdi tómendetýge bolmaıdy. Bolon júıesine kósher aldynda mundaı olqylyqtyń bolǵanyn bilemiz. Sol kezeńde kandıdattar men doktorlardyń kóbeıip ketkenin de jáne olardyń qalaı qorǵalǵanyn da kórdik. Sol sebepti ondaı kezge qaıta oralmaý úshin PhD-di óz deńgeıinde ustap otyrýymyz qajet. Jeńil jolmen qorǵaǵan on PhD-den góri bir-eki naǵyz ǵalymdy tárbıelep shyqsaq, eldiń ǵylymyna da, ekonomıkasyna da kóbirek paıdaly bolatyny anyq. Sondyqtan burynǵy qatelikterimizden sabaq alyp, onyń qaıtalanýyna jol bermeýimiz kerek», – dedi Máýlen Áshimbaev.
Sondaı-aq Senat Spıkeri bizdiń ǵalymdarymyz shetelde de qurmetke ıe. Bedeldi naǵyz ǵalym bolýy kerektigin aıtyp, mundaı deńgeı joǵary talaptan bastalatynyna nazar aýdardy. Osyǵan oraı ol tıisti mınıstrlik bul baǵyttaǵy jumystardy jan-jaqty pysyqtap, aldaǵy ýaqytta da júıeli túrde jalǵastyra berýi kerek ekenine toqtaldy.
Aıta keteıik, búgin Senat otyrysynda «Qazaqstan Respýblıkasynyń keıbir zańnamalyq aktilerine ǵylym jáne bilim berý máseleleri boıynsha ózgerister men tolyqtyrýlar engizý týraly» zań qaralyp, maquldandy. Jańa normalar ǵalymdardyń áleýmettik kepildikterin jaqsartýǵa jáne ǵylymda qarjy resýrstaryn paıdalanýdy ońtaılandyrýǵa baǵyttalǵan.
