Petropavlǵa kireberiske Botaıǵa arnalǵan monýment qoıyldy

PETROPAVL. KAZINFORM – Petropavl qalasynyń kireberis qaqpasyna erekshe tarıhı nysan – Botaı mádenıetine arnalǵan monýment ornatyldy.

Monýmentaldy óner týyndysy búgin ǵalymdar, arheologtar, zııaly qaýym ókilderi, mádenıet salasynyń mamandary jáne qoǵam belsendileriniń qatysýymen saltanatty túrde ashyldy.

- Botaı – jer júzinde jylqy alǵash qolǵa úıretilgen jer ekendigi dáleldendi. Eger de úı jylqysy bolmasa, adamzat órkenıeti múlde basqasha damıtyn ba edi. Biz arheologııalyq qazba jumystaryn bastaǵanda álemdik mańyzy bar jańalyq ashamyz dep oılaǵan joqpyz. Sol kezde Vıktor Zaıberttiń bastamasymen ekspedıtsııa uıymdastyrylyp, qazba jumysy bastaldy. Bizdiń mamandar ol jerden bir sómke kóne, biraq jaqsy saqtalǵan qundy jádigermen oraldy. Botaı – búginde bizdiń maqtanyshymyzǵa aınaldy, - deıdi arheolog-ǵalym Anatolıı Pleshakov.

Eskertkishtiń bıiktigi tuǵyrymen eseptegende 14 metr. Ony músinshiler tórt aı ishinde jasap shyqty. Ústi qoladan quıylsa, tuǵyryna kúrti granıti qoldanylǵan. Músinshiler ár bólshegin shynaıy jetkizýge tyrysyp, ony zamanaýı músin óneriniń ozyq úlgileri qataryna qosýǵa talpyndy.

- Bul monýment – komandalyq jumys. Belgili músinshiler Asqar Narytov, Murat Sydyqov jáne men – Baýyrjan Jalyn birge istedik. Kompozıtsııasy óte kúrdeli, úsh qyrly tuǵyrdan turady. Úsh ulttyń tilinde bizdiń tarıhymyzdy aıqyndasyn degen ıdeıa. Jer sharyn ornatyp, osy arqyly álemde alǵash ret Qyzyljar jerinde jylqynyń qolǵa úıretilgenin kórsettik. Tańbaly tastar, balbaldar – bizdiń tarıhymyz, sondyqtan jan-jaǵyna ornattyq.

Eskertkish kóńilimizden shyqty. Kelgen sheteldikterdiń, ózimizdiń qazaqstandyqtardyń kóz qýanyshyna aınalar monýment bolady dep oılaımyn, - deıdi joba avtorlarynyń biri Baýyrjan Jalyn.

Buǵan deıin SQO-da qaıtarylǵan aktıvter esebinen 30 aýylǵa sý qubyry tartylyp jatqanyn jazǵan edik.