Petropavlǵa kireberiske úsh blokpost qoıyldy

PETROPAVL. QazAqparat – Petropavldyń aınalasyna kireberiske úsh blokpost qoıyldy, Soltústik Qazaqstan oblysy shekaralarynda baqylaý-ótkizý rejımi engizildi, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, polıtsııa qyzmetkerleri erekshe rejımde jumys istep jatyr. Oblys ortalyǵynyń aınalasyna blokposttar qoıyldy. Bul jerde tártip saqshylary Petropavlǵa bara jatqan kólikterdi tekserip baryp ótkizip jatyr. Taǵy osyndaı eki beket perımetr boıynsha qoıylǵan. Aýdandarda, ázirge, mundaı qatań baqylaý joq. Desek te oblysqa kirip-shyǵý shektetildi. Qoǵamdyq tártipti, halyqtyń turmys-tirshiligin qamtamasyz etetin asa mańyzdy memlekettik strategııalyq obektilerdiń kúzeti kúsheıtildi. Qala syrtyndaǵy joldarda patrýldik polıtsııa batalonynyń qyzmetkerleri jumys istep jatyr.

Oblys shekaralarynda baqylaý-ótkizý rejımi aıasynda polıtseıler adamdardan jeke basty kýálandyratyn qujatty talap etip, jeke zattaryn, kólik quraldaryn tekserip qana ótkizip jatyr.

«Petropavl men SQO aýmaǵyna halyqtyń tirshiligin qamtamasyz etetin uıymdardyń qyzmetkerleri, medıtsınalyq kórsetilim boıynsha emdeý mekemelerine baratyn nemese odan shyqqan jáne statsıonarda emdelýdegi adamdar, tranzıttik júk kólikteri, jumys ornynan anyqtama kórsetken kezde jumys ornyna baratyn adamdardyń kóligi, turǵylyqty jerine baratyn adamdar óte alady», - delingen habarlamada.