Petropavldyqtardy ınternet arqyly taqyrǵa otyrǵyzǵan jigit Almatyda ustaldy
SQO polıtsııa departamenti baspasóz qyzmetiniń málimetinshe, polıtsııaǵa Petropavldyń úsh turǵyny aryzdanyp, ózderiniń ınternet-alaıaqtyń qurbanyna aınalǵanyn aıtqan. Olardyń sózinshe, áleýmettik jelide ótken jyly arzan baǵamen satylatyn jıhazdyń habarlandyrýlary jarııalanǵan. Al satyp alý úshin aldyn ala tólem jasaý qajet bolǵan. Aqsha qolyna túskennen keıin «satýshy» baılanysty úzgen.
Jábirlenýshiler 40 myńnan 120 myń teńge aralyǵynda aldyn ala tólem jasaǵan. Atalǵan faktiler «Alaıaqtyq» baby boıynsha Sotqa deıingi tergep-tekserýdiń biryńǵaı tizilimine engizildi.
Jedel ýákilder kúdiktini anyqtap, qyzmettik issapar kezinde quryqtady. Kúdikti páter urlyǵy úshin buryn isti bolǵan Almaty qalasynyń 22 jastaǵy turǵyny bolyp shyqty. Ol tergeý ızolıatoryna qamaldy. Qazirgi ýaqytta SQO aýmaǵynan tys jerde jasalǵan taǵy 40 alaıaqtyqqa qatysy barlyǵy anyqtaldy. Polıtseıler áli de kúdiktiniń áreketterinen zardap shekkenderdi anyqtap jatyr.
«OLx.kz saıtynyń ákimgeri qylmystyń aldyn alýǵa kómektesip, ár paraqshaǵa ınternet-alaıaqtyq qaýpi týraly habarlama ornalastyrǵan. Polıtsııa qyzmetkerleri mundaı qylmystardyń aldyn alý úshin jadynamalardy taratyp, BAQ-ta jáne áleýmettik jelilerde aqparat ornalastyrý arqyly eskertedi. Profılaktıkalyq jumys óz nátıjesin berip jatyr. Sońǵy jyldary ınternet-alaıaqtyqtyń sany kúrt artqanymen, tosqaýyl qoıý múmkin boldy. Ótken jyldyń eki aıynda SQO-da 139 ınternet-alaıaqtyq faktisi tirkelse, jyldyń basynan 118 aryz tústi», - deıdi SQO polıtsııa departamenti krımınaldyq polıtsııa basqarmasynyń bastyǵy Marat Jumalıev.
