Petropavldy sýmen qamtý úshin balama kózder qarastyrylyp jatyr
PETROPAVL. KAZINFORM – Petropavlda bir táýlikten beri sý joq. Qazirgi ýaqytta máseleni sheshý úshin apattyq-qalpyna keltirý brıgadalary jumys istep jatyr. Bul týraly qala ákimi Serik Muhamedıev brıfıngte aıtty.
«Men Petropavldaǵy birinshi kótergish stantsııasyndaǵy jaǵdaı 4 saǵat ishinde durystalatyndyǵyn aıtqan edim. Oqıǵa ornynda apattyq-qalpyna keltirý brıgadalary jumys istep jatyr. Nysan aınalasyna bóget salynyp, nyǵaıtylǵan edi. Búginde tasqyn sý sol bógettiń boıyna jetti. Sondyqtan jumysshylardy qaýipsiz jerge shyǵarýǵa týra keldi.
Birinshi vıtse-mınıstr Roman Sklıar men oblys ákimi Gaýez Nurmuhambetovtyń tapsyrmasy boıynsha biz mundaǵy energııany qalpyna keltirýmen qatar ekinshi kótergish sorǵy stantsııasyna sý berý jumystaryn bastadyq. Sý ekinshi deńgeıdegi stantsııa arqyly beriledi, jumys aıaqtalýǵa jaqyn. Tazartý qondyrǵylaryn toltyrý bastalady. Biz balama retinde sýdy Pestroe kólinen alýǵa tyrysamyz. Taldaý júrgizildi, sý normaǵa sáıkes keledi, erteńnen bastap sý beriledi, biraq ony ishýge bolmaıdy. Bul tehnıkalyq sý», - dedi Serik Muhamedıev.
Qala ákiminiń aıtýynsha Petropavlda mınımaldy sý tutyný táýligine 30-40 myń tekshe metr. Eger de eki balama sý kózin qosqan jaǵdaıda, ol qalany sýmen tolyq qamtýǵa jetpek.
«Birinshi kótergish sorǵy stantsııasyna qosymsha elektr stantsııasy ákelindi, generator apattyq jaǵdaıda qosylady. Biraq sý sorǵy stantsııasyna jetkendikten generatordy ázirge iske qospaıdy», - dedi qala ákimi.
Esterińizge sala keteıik, keshe tańerteń Petropavlda sý berý toqtap qaldy. Tasqyn sýmen kelgen muz birinshi kótergish sorǵy stantsııasyna qýat beretin elektr jelisiniń baǵandaryn qulatty.
