Petropavldaǵy ortalyq alańda etnoaýyl ashyldy

PETROPAVL. QazAqparat - Petropavldyqtar Naýryz merekesin atap ótý úshin mádenı-buqaralyq sharalar uıymdastyrylǵan ortalyq alańǵa jınaldy, dep habarlaıdy «QazAqparat» HAA tilshisi. 

Petropavldyń túrli aýdandaryndaǵy alańdarda da jappaı merekelik sharalar ótip jatyr.
Ortalyq alańda etnoýyl ornalastyrylǵan. Munda qazaq halqynyń turmys-tirshiligin, ulttyq dástúrlerin nasıhattaıtyn kıiz úıler tigildi. Birinshi kıiz úıde úılenýge baılanysty, ekinshi kıiz úıde - sábıdiń dúnıege kelýine qatysty salt-dástúr men joralǵylar, 3-shi kıiz úıde - qazaq halyq aspaptary, 4-de - áskerı óner, ańshylyqtyń dástúrli túrleri, 5-de - qazaqtyń ulttyq kıimderi men áshekeıleri, 6-da - ulttyq ydys-aıaq kórsetilimderi boldy.
Bıyl barlyq kıiz úıler qala turǵyndary úshin ashyq boldy. Mundaı tapsyrmany oblys ákimi Qumar Aqsaqalov bergen. Kıiz úılerdiń janyna baýyrsaq, naýryz kóje, sháı, táttiler qoıylǵan.
Ortalyq alańda túrli janýarlarmen fotoǵa túsýge, altybaqan tebýge, saýda-sattyq jasaýǵa bolady. Sondaı-aq, Qazaqstan estradasynyń juldyzy Aıqyn Tólepbergenniń qatysqan merekelik kontsert ótip jatyr.
Ortalyq alańda sporttyq sharalar ótýde. Qala turǵyndary ulttyq oıyndarǵa qatysyp, palaý men shaıdan aýyz tııýde. Keshke retrodıskoteka uıymdastyrylmaq.