Petropavldaǵy jolaýshy tasymalyna qosymsha sýbsıdııa berildi

PETROPAVL. KAZINFORM – Petropavlda jolaýshy tasymaldaýshylardyń shyǵynyn jabý úshin bıýdjetten qosymsha qarajat bólindi. Tilshi saýalyna qalalyq ákimdik ókilderi jaýap berip, máseleniń sheshimin taýyp jatqanyn jetkizdi.

«Bıyl jolaýshy tasymaldaýshylarǵa 2,7 mlrd teńge sýbsıdııa bólindi. Olardyń qosymsha jańa avtobýstar – 31 qoǵamdyq kólik alýyna baılanysty shyǵyndary artty. Bıýdjettik komıssııa bólinetin sýbıdııa mólsherin qaıta qarastyrdy. Qosymsha qarjy bólý týraly sheshimge sáıkes endi 363 mln teńge qarjy bólingeli otyr. Onyń 300 mln teńgesi – jolaýshy tasymaldaýshylardy sýbsıdııalaýǵa, qalǵan 63 mln teńgesi – qoǵamdyq kólikte tegin júrýge jeńildigi bar azamattar úshin berildi», - dedi Petropavl qalasy ákiminiń baspasóz hatshysy Ásem Aıtýlova.

Petropavlda 12 sanat boıynsha 5,5 myń adam qoǵamdyq kólikte tegin júrý quqyǵyna ıe. Olardyń ishinde 1-2 top múgedektigi bar adamdar, múmkindigi shekteýli balalar, maıdangerler, kóp balaly analar jáne olardyń balalary bar.

«Soltústik Qazaqstan oblysynyń Avtokólik odaǵy» qaýymdastyǵynyń tóraǵasy Galına Semenovanyń aıtýynsha, qosymsha bólingen 363 mln teńge jyldy shyǵynsyz aıaqtaýǵa jetkiliksiz.

«Aqsha bólingendigin bilemiz. Bul bizdiń qarasha aıyna deıingi qaryzymyzdy jaýyp, shyǵyndarymyzdy ótedi. Jyldy aıaqtaý úshin áli de 200 mln teńgege jýyq aqsha kerek», - deıdi qaýymdastyq tóraǵasy.

Esterińizge salaıyq, buǵan deıin Petropavlda qoǵamdyq kólik sany eki ese qysqarýy múmkin ekenin aıtqan edik. Jolaýshy tasymaldaýshylar jergilikti bıýdjetten tolyq qarjylandyrylmaǵandyqtan janar-jaǵarmaıdy qaryzǵa alýǵa májbúr bolǵan.