Petropavldaǵy jańa ınnovatsııalyq jylyjaı alǵashqy ónimin bere bastady
Petropavldaǵy zamanaýı jylyjaı kesheniniń alǵashqy ónimi – qııar jergilikti sórege tústi. Nysannyń ashylýymen 60 adam jumyspen qamtyldy, dep habarlaıdy Kazinform.
Soltústik Qazaqstan oblysynyń ákimi Ǵaýez Nurmuhambetov jylyjaı kesheninde bolyp, jumysyn kórdi. Bul jaıynda óńir basshysy áleýmettik jelidegi paraqshasynda jazba qaldyrdy.
«Jylyjaı kesheninde kún saıyn 6 tonnaǵa deıin qııar jınalady, tolyq qýatyna shyqqanda ónimdilik 16 tonnaǵa deıin jetpek.
Bizdiń oblys úshin qııar tutyný kórsetkishi táýligine 50 tonnany quraıdy. Jańa jylyjaıdyń ónimi oblys suranysynyń 30 % jaýyp, qysta baǵaǵa áser etedi. Soltústik óńir úshin jylyjaıdyń bolýy – qajettilik. Soltústikqazaqstandyqtar jańa pisken kókónistermen jyl boıyna qamtylady, ári ımporttyq ónimge qaraǵanda arzanyraq. Jergilikti qııar qalamyzdyń sýpermarketterinde satyla bastady.
Jalpy, jańa jylyjaıdan jylyna 3 myń tonna qııar, qyzanaq jáne salat jınalmaq.
«Zelenyı sever» seriktestigi jobaǵa 1,4 mlrd teńge ınvestıtsııa quıdy. Taǵy 5,8 mlrd teńgeni «Soltústik» ÁKK jeńildetilgen nesıe túrinde qarjylandyrdy. Memleket ınjenerlik jelilerdi tartýǵa da kómektesti. Bul 4-shi býyndy jylyjaı kesheni, Nıderlandy eliniń zamanaýı qondyrǵylary ornatyldy. Jylyjaıdyń óz mıkroklımaty bar, búkil protsess kompıýtermen basqarylady», - dep jazdy Ǵaýez Nurmuhambetov.
