Petropavldaǵy jalǵyz jaǵajaıda demalýshylarǵa jaǵdaı jasalmaǵan
PETROPAVL. KAZINFORM – Petropavldaǵy Pestroe kóli jaǵajaıyna turǵyndardyń kóńili tolmaıdy. Óıtkeni munda ne dýsh, ne dárethana jumys istemeıdi.
Petropavlǵa ystyq kúnder qaıtyp kelip, turǵyndar shomylýǵa resmı ruqsat berilgen Pestroe kóline aǵyldy. Alaıda demalys orny halyqty qabyldaýǵa daıyn bolmaı shyqty. Turǵyndardyń aıtýynsha, dýshqa sý keletin qubyr jarylyp, ol kólge aǵyp jatyr. Aqyly dárethanalar bolǵanymen, olardyń esiginde qulyp tur.
Petropavl qalasy ákimdigi máselege qatysty túsinik berdi. Ákimniń baspasóz hatshysy Ásem Aıtýlovanyń aıtýynsha, Esil ózenindegi qalalyq jaǵajaı byltyr sý tasqynynan keıin jabyldy. Bıyl Tótenshe jaǵdaılar departamenti mamandary tekserip, jaǵajaıdan eki metrden keıin birden tórt metrge jetetin jyra barlyǵyn anyqtady. Qaýipti bolǵandyqtan shomylýǵa tyıym salynyp otyr.
– Pestroe kólindegi jaǵajaıda «Kommýnhoz Petropavlovsk» JShS qyzmet kórsetedi, ıaǵnı qoqysty jınaıdy. Jergilikti kásipkerlerdiń birine bul jaǵajaı beriledi. Ol óz qarajatyna bul jerdi abattandyrady, jaqynda iske kirisýi kerek. Kelesi jyly maýsymdyq akvapark salýdy josparlap otyr. Budan bólek qosymsha qyzmetter usynýy múmkin. Al, jaǵajaıǵa kirý burynǵydaı tegin bolady, - deıdi baspasóz hatshysy.
Mamannyń aıtýynsha, qalalyq jaǵajaı kásipkerge uzaq ýaqytqa paıdalanýǵa berilmek.
Buǵan deıin SQO-da jasóspirim qoldan jasalǵan qazanshuńqyrǵa batyp ketkenin jazǵan edik.