Petropavldaǵy Zarechnyı kenti turǵyndary kóshiriledi

PETROPAVL. KAZINFORM — Petropavldaǵy jylda kóktemde sý basý qaýpi bar Zarechnyı kenti turǵyndary bul aýdannan kóshirilmek. 

Jergilikti bılik Esil ózeniniń jaǵasynda ornalasqan eldi mekende turý qaýipti jáne tasqynnyń saldarymen kúresý tıimsiz degen sheshimge keldi. Osyǵan oraı Zarechnyı kentindegi turǵyndardy basqa jerge kóshirý josparlanǵan. 

Petropavl qalasy ákiminiń baspasóz hatshysy Ásem Aıtýlovanyń aıtýynsha, byltyrǵy sý tasqynyna deıin Zarechnyı kentinde 440 úı bolǵan. Sý ketkennen keıin 189-y turýǵa jaramsyz bolyp, buzyp alyndy. Qazirgi tańda munda 251 úı jáne 521 adam qalǵan. Onyń 160-y páter bolsa, qalǵany — jeke turǵyn úı. 

— Jylda sý basý qaýpi týady. Al eldi mekendi tasqynnan qorǵaý úshin bóget salý tıimsiz. Sol sebepti turǵyndardy kóshirý týraly sheshim qabyldandy. Qazir Petropavlda osy kenttiń turǵyndaryna arnalyp eki kóp qabatty turǵyn úı salynyp jatyr. Ol paıdalanýǵa berilisimen-aq turǵyndar kóshiriledi. Aralarynda páterden kóshýge bas tartqandar bolsa, olarǵa aqshalaı ótemaqy beriledi. Al múldem kóshýden bas tartqan jaǵdaıda sol jerde tura beredi, — deıdi Ásem Aıtýlova.

Turǵyndar qazirgi baspanasynyń aýdanyna baılanysty páterge ıe bolady. 

— Sol aýdanda turatyn saıajaı úılerine munyń qatysy joq. Egerde saıajaı ýchaskesindegi úı onyń jalǵyz baspanasy bolsa, basqalary sııaqty páter kezegine tura alady. Sondaı-aq jer ýchaskesin alýǵa ótinish qaldyrýǵa quqyly, — deıdi Ásem Aıtýlova.

Buǵan deıin Petropavlda órt sóndirýshiler baspanaly bolǵanyn jazǵan edik.