Petropavldaǵy qoqys polıgonynda 7 mıgrant zańsyz jumys istep kelgen
PETROPAVL. KAZINFORM – Soltústik Qazaqstan oblysynda polıtseıler «Mıgrant» jedel-profılaktıkalyq is-sharasyn ótkizip jatyr.
SQO polıtsııa departamenti baspasóz qyzmetiniń málimetinshe, kóshi-qon qyzmetiniń qyzmetkerlerinen bólek, is-sharaǵa ýchaskelik polıtsııa ınspektorlary, patrýldik polıtseıler, jedel ýákilder jumyldyryldy.
Reıd barysynda bazarlar, qurylys alańdary, fermalar men sheteldikterdiń zańsyz eńbek kúshi paıdalanylýy múmkin basqa da oryndar tekserilip jatyr.
Máselen Petropavl mańyndaǵy polıgonda qatty qoqys qaldyqtaryn qaıta paıdalaný úshin bólýmen aınalysyp júrgen Tájikstan eliniń 7 azamaty anyqtaldy. Olarda esh ruqsat qujat bolmaǵan. Sheteldikterdiń aıtýynsha, ruqsat qujattaryn keıin resimdeýdi josparlaǵan. Jınalǵan materıal ákimshilik sotqa jiberildi. Zań buzýshylar endi aıyppul tóleýi múmkin.
«Zańdy túrde jumys isteý úshin jergilikti atqarýshy organnyń eńbekpen aınalysýǵa ruqsat beretin qujattaryn ýaqytyly resimdeý qajet. Sondaı-aq sheteldikterdiń eńbek kúshin zańsyz paıdalanýǵa jol bergen jumys berýshige qatysty ákimshilik materıal jınalýda», – deıdi SQO PD kóshi-qon qyzmeti basqarmasynyń bastyǵy Talǵat Ábilov.
Jedel-profılaktıkalyq is-sharanyń alǵashqy kúninde tártip saqshylary sheteldikterdiń tarapynan bolǵan kóshi-qon zańnamasyn buzýdyń 23 deregin anyqtady.
