Petropavldaǵy Qalyńdyq úıi jańaryp, ekinshi tynysy ashyldy
PETROPAVL. KAZINFORM — Ǵasyrdan astam tarıhy bar kóne ǵımaratta qazir Maǵjan ortalyǵy ornalasqan.
Halıt ıAngýzarov kópes HІH ǵasyrdyń sońynda turǵyzǵan ǵımarat respýblıkalyq mańyzy bar tarıhı-mádenı eskertkish retinde qorǵaýǵa alynǵan.
Ańyz boıynsha, jas kópes Máskeýge baryp, úlken shaharda has sulýǵa ǵashyq bolady. Sezimin bildirip, oǵan kúıeýge shyǵýyn suraıdy. Alaıda, baıdyń erke qyzy onyń usynysyna kúlip, Petropavlda ákesiniń Máskeýdegi úıiniń dál kóshirmesin salyp berse ǵana turmysqa shyǵatynyn aıtady.
Halıt bir jyl ishinde ıtalıan sáýletshiniń jobasy boıynsha osy erekshe ǵımaratty salyp shyǵady. Sodan beri bul úı halyq arasynda «Qalyńdyq úıi» atalyp ketken.
Birneshe ret qırap qala jazdaǵan erekshe nysanda byltyr kúrdeli jóndeý jumystary júrgizildi.
Almatylyq Qazaq materıaldyq mádenıet ǵylymı-zertteý jáne jobalaý ınstıtýtynyń mamandary úıdiń bastapqy keıpin barynsha saqtap, qalpyna keltirýge tyrysty.
Restavratsııa jumysy barysynda úıdiń tóbesi, qabyrǵalarynan qazirgi ýaqytta sırek kezdesetin alfreıli jazba tabyldy.
Ǵımarat modern stılinde salynǵanymen, negizinen gúldermen bezendirilgen. Jóndeý jumysymen aınalysqan merdiger kompanııa munyń bárin saqtap qalýǵa tyrysty.
Sondaı-aq, sáýletshi kezinde úıdiń árleý jumystaryna ıtalıan keramıka taqtaıshalaryn qoldanǵan, ol da búginge deıin jaqsy saqtalǵan.
Erekshe ǵımarat bıyl jazda Maǵjan ortalyǵy bolyp qaıta ashyldy. Oǵan Qazaqstannyń qurmetti jýrnalısi, belgili maǵjantanýshy Jarasbaı Súleımenov jetekshilik etedi.
— Osynda kelip, úıdi, jádigerlerdi tamashalap jatqan adamdar óte kóp. Bul ortalyqtyń negizgi maqsaty — osy óńirde ádebıetti damytýǵa úles qosý. Maǵjannyń murasyn burynǵydan da tereńirek zertteý, Maǵjandy ulyqtaý, nasıhattaý. Ásirese mynaý jas býynnyń sanasyna Maǵjan esimin sińirý. Bul jerde Maǵjannyń ǵana emes, óńirimizden shyqqan qabyrǵaly qalamgerler de nazarda bolady. Olardyń ómirine, shyǵarmashylyǵyna qatysty is-sharalar uıymdastyrylady. Kelip jatqan adamdardyń barlyǵyn qabyldaımyz. Іshindegi dúnıelerin kórsetemiz, Maǵjan týraly bilgenimizdi aıtamyz. Onyń bári durys, biraq, olardyń túsinýinshe, bul murajaı sııaqty ashylǵan, solaı qabyldap jatyr. Bul kádimgi Maǵjan murasyn zertteýmen aınalysatyn, sony damytatyn ortalyq, — deıdi Jarasbaı Súleımenov.
Esterińizge salaıyq, erekshe tarıhy bar Petropavlda kóptegen kóne ǵımarattar saqtalǵan.
