Petropavlda jekemenshik balabaqshalar jabylýy múmkin

PETROPAVL. KAZINFORM – Petropavldaǵy jekemenshik balabaqshalar qarjylandyrýdyń qysqarýynan jabylýdyń az-aq aldynda tur. 

балабақша
Фото: "Қазақмыс" корпорациясы

SQO kásipkerler palatasy baspasóz qyzmetiniń málimetinshe, keńes otyrysynda mekemelerdiń ókilderi azyq-túlik baǵasynyń óskenin, al ata-analardan alynatyn tamaqtandyrý tólemaqysynyń qysqarǵanyn aıtty. Sondaı-aq memlekettik jáne jekemenshik balabaqshalardy qarjylandyrýda da aıyrmashylyq bar. 

SQO kásipkerler palatasy qyzmetteri keńesiniń tóraǵasy, «ABVGDeıka» jeke balabaqshasynyń jetekshisi Olga Jarkovanyń aıtýynsha, másele jyl saıyn qańtarda memlekettik tapsyrys ornalastyrylǵan kezde týyndaıdy. Jan basyna shaqqandaǵy qarjylandyrý ádistemesi jeke jáne memlekettik mekemeler úshin ártúrli bekitilgen. 

— Qyzmetkerlerdiń eńbekaqysyna, jańa sanattar úshin tárbıeshilerge qazir qosymsha tólemder bar. Biraq bul jan basyna shaqqandaǵy qarjylandyrý ádistemesine engizilmegen jáne sáıkesinshe esepteýler eski sharttar boıynsha júrgiziledi. Biz bilim basqarmasyna birneshe ret habarlastyq, kómek bar, ol jetkiliksiz. Toptarda bala sanynyń azdyǵynan jáne olardyń sebepsiz kelmeı qalýynan jekemenshik balabaqshalardy qarjylandyrý azaıady. Biraq memlekettik balabaqshalarda jaǵdaı múlde basqa, - deıdi Olga Jarkova. 

Kásipkerlerdiń aıtýynsha, qazir olarǵa bólinetin bıýdjet qarajaty qyzmetkerlerdiń eńbekaqysyna ǵana jetedi. Máselen, ótken jylmen salystyrǵanda jekemenshik balabaqshalardy qarjylandyrý ınflıatsııa 9,4% bolǵan kezde nebári 3,3%-ǵa ósken. 

Bıyldan bastap ata-analar úshin tólem azaıǵan. Eger byltyr ata-analar balalarynyń tamaǵy úshin 3 jasqa deıingi balaǵa 18 249 teńge jáne 3 jastan 6 jasqa deıingi bala úshin 22 628 teńge tólegen bolsa, bıyl áleýmettik mańyzy bar ónimder men taýarlar baǵasyna sáıkes birinshi jas sanaty úshin 17 236 teńge jáne ekinshi jas sanaty úshin 22 158 teńge bolyp bekitildi. Qaýly «Ashyq NQA» portalynda jarııalanǵan. 

SQO bilim basqarmasynyń ókilderiniń aıtýynsha, ata-analyq tólemniń tómendeýine prokýratýra men ekonomıkalyq tergeý departamentiniń tekseris nátıjeleri sebep bolǵan. Baǵany belgileýde zań buzýshylyqtar anyqtalǵan. Nátıjesinde 11 memlekettik balabaqshanyń basshysy tártiptik jazaǵa tartyldy. Al prokýratýra usynymymen 2024 jyldyń 1 shildesinen bastap mektepke deıingi balalar mekemelerindegi ata-analyq tólem áleýmettik mańyzy bar ónimderdiń baǵasyna qaraı belgilenetin boldy. 

Biraq memlekettik balabaqshalar elektrondyq format aıasynda memlekettik satyp alý veb-portalynan belgilengen baǵamen azyq-túlikti satyp alý múmkindigine ıe bolsa, jekemenshik balabaqshalar ony kóterme-bólshek baǵamen alady. 

Jekemenshik balabaqshalar osy ózgeristerge baılanysty mázirdi qaıta qaraýǵa májbúr. Qarjynyń azdyǵynan sıyr etinen bas tartyp, ony taýyq etimen, jemisterdi shyryndarmen almastyrýǵa týra keledi. 

Osy máselege baılanysty, SQO kásipkerler palatasy Qaýly jobasyn egjeı-tegjeıli esepteýler júrgizý úshin bilim basqarmasyna qaıtarmaq. Al kelesi talqylaýdy prokýratýra jáne ekonomıkalyq tergeý departamentiniń qatysýymen ótkizýdi josparlaǵan. 

— Qazirgi jan basyna shaqqandaǵy qarjylandyrýdyń qoldanystaǵy ádistemesi jáne tamaq daıyndaý normalary tek Petropavlda ǵana emes, el boıynsha jekemenshik balabaqshalardy tyǵyryqqa tirep otyr. Balabaqshalar jabylyp qalmaýy úshin Oqý-aǵartý mınıstrligi men qarjy organdary aralasý kerek, - deıdi kásipkerler. 

Buǵan deıin SQO-da tasqynnan zardap shekkenderge baspana salǵan 15 kompanııa janjaldan keıin tıisti aqshalaryn alǵanyn jazǵan edik. 

Сейчас читают