Petropavlda jańa jobalar úshin 128 mlrd teńgeniń kelisimsharty jasaldy
PETROPAVL. KAZINFORM – Búgin Petropavlda «Qyzyljar Investment Forum-2024» halyqaralyq ınvestıtsııalyq qurylys forýmy ótti. Oǵan ulttyq kompanııalardyń, qarjy ınstıtýttarynyń, bıznes-qaýymdastyqtardyń, otandyq jáne sheteldik kásiporyndardyń ókilderi qatysty.
Soltústik Qazaqstan oblysy ákimi baspasóz qyzmetiniń málimetinshe, halyqaralyq forýmde qurylys salasyna erekshe basymdyq berildi. 2021 jyldan bastap óńirde qurylys kólemi 70 % ósken. Petropavlda turǵyn úı qurylysy, jóndeý, kommertsııalyq turǵyn úı, áleýmettik-mádenı, bilim berý jáne qurylys nysandary baǵdarlamalaryn iske asyrý jobalaryn qarastyratyn egjeı-tegjeıli qala jospary da bekitilgen. Aımaq zamanaýı kommertsııalyq turǵyn úı salý jáne áleýmettik nysandar turǵyzý úshin ınvestorlardy qabyldaýǵa daıyn.
Búgingi tańda óńir ekonomıkasynyń 15%-y ónerkásipke tıesili. Óńir kásiporyndary munaı-gaz jáne energetıka salasyna arnalǵan ónimderdi, elektrtehnıkalyq buıymdardy, aýyl sharýashylyǵy tehnıkasyn shyǵarady.
Byltyr oblystyń ónerkásip salasy 647 mlrd teńgeniń ónimin shyǵardy. Desek te, SQO-da ekonomıkanyń negizi – aýyl sharýashylyǵy, respýblıkadaǵy óndiristiń 10 % óńirge tıesili. Búginde «eldiń sút beldeýin» qurý boıynsha jumystar belsendi júrgizilip jatyr. Qazaqstandaǵy árbir ekinshi sút-taýar fermasy osy óńirde salynyp jatyr.
Sonymen qatar oblysta ındýstrııalyq-agrarlyq ekonomıkaǵa kóshý jumysy jalǵasyp jatyr. 3 jyl ishinde SQO-ǵa sheteldik 15 jańa kompanııa keldi. Investorlar úshin «Qyzyljar» arnaıy ekonomıkalyq aımaǵy qurylǵan. Ol respýblıka boıynsha sońǵy qurylǵan, qazirgi ýaqytta onyń aýmaǵynda 4 kompanııa óz ónimderin shyǵaryp jatyr. Olar: «Claas» aýyl sharýashylyǵy tehnıkasyn qurastyratyn nemis kontserni, Petropavl elektr tehnıkalyq zaýyty, «QAZTEHMASh» mashına jasaý zaýyty, tirkeme jáne aspaly tehnıka jasaıtyn «Reimann» kompanııasy.
Budan bólek taǵy 16 kompanııa quny 632 mln AQSh dollary bolatyn ınvestıtsııalyq jobany júzege asyrmaq. Nátıjesinde 3 myńnan astam jańa turaqty jumys oryndaryn qurady.
Halyqaralyq forým aıasynda jalpy quny 128 mlrd teńge 14 yntymaqtastyq memorandýmyna qol qoıyldy. Bul kelisim aıasynda óńirde jańa jobalar júzege asyrylmaq. Onyń úsheýi Petropavl qalasynda qolǵa alynady dep josparlanǵan.
