Petropavlda jańa úılerde otbasylyq-dárigerlik ambýlatorııalar ashylady
SQO ákimdiginiń otyrysynda óńir basshysy Qumar Aqsaqalov «Nur Otan» sezinde Elbasynyń aıqyndaǵan tapsyrmalaryn oryndaý boıynsha óz josparlarymen bólisti.
Elbasy bilim berý jáne densaýlyq saqtaý salasyna kóp kóńil bólip otyr. Alǵashqy medıtsınalyq kómek boıynsha jumysqa qarqyn qosylady. Bul salaǵa qarjy kólemi 40 tan 60 %-ǵa deıin óspek. Soltústik Qazaqstan oblysyna 10 mlrd teńge baǵyttalmaq, buryn bul soma 8 mlrd teńge edi.
«Oıqala jáne Jas Órken aýdandarynda birde-bir dárigerlik-otbasylyq ambýlatorııa joq. «Berekede» dárigerlerge aýyrtpalyq úlken. Turǵyndar ortalyqqa baryp kórinýge májbúr. Qazirgi maqsat - ambýlatorııalardy yńǵaıly etip jaqyn ornalastyrý. Biz osy shaǵynaýdandarda medıtsınalyq ortalyqtar ashyp, 5-6 dárigerdi bekitemiz. Olar salynyp jatqan úılerde ornalaspaq. Bıyl qalada 3 ambýlatorııa ashylady», - dedi Qumar Aqsaqalov.
SQO ákimdigi baspasóz qyzmetiniń málimetinshe, bilim berý salasynda da jańalyq kóp. Bıyl 10 kolledj jańartylmaq. Bes jyl buryn barlyq kolledjderdi jóndeýge 300 mln teńge jumsalsa, endi «Jas maman» jobasy aıasynda ár kolledjge 350 mln teńge bólinbekshi. Bul bilim mekemelerinde stýdentterdiń 70 paıyzy oqıdy.
Mamandardyń aıtýynsha, áleýmettik salaǵa búkil bıýdjettiń 43 paıyzy baǵyttalady. Bul - shamamen 90 mlrd teńge. Sondaı-aq qosymsha 10 mlrd teńge bólý josparlanǵan.
