Petropavlda jańa stýdentter jataqhanasy salynady

PETROPAVL. QazAqparat – Petropavlda «Nur Otan» partııasy jáne oblystyq sybaılas jemqorlyqqa qarsy qyzmet mamandary monıtorıng júrgizdi, dep habarlaıdy QazAqparat tilshisi.

SQO Sybaılas jemqorlyqqa qarsy qyzmettiń málimetinshe, reıd barysynda monıtorıngtik tobynyń músheleri M.Qozybaev atyndaǵy Soltústik Qazaqstan memlekettik ýnıversıtetiniń tórt jataqhanasyn aralap, stýdenttermen kezdesti.

«Jataqhanalarǵa oqýshylar belgilengen talap boıynsha sanıtarlyq normalarǵa saı ornalastyrylady. Oryn úshin tólemaqy QR zańnamasyna sáıkes jáne jataqhanany ustaýǵa ketetin shyǵyndarǵa oraı belgilenedi. Jetimderge oryn tegin beriledi. Stýdentter «elektrondy rektorat» arqyly tamyz aıynda úılerinen shyqpaı jataqhanaǵa turýǵa ótinish bere aldy. Bul júıe eń bastysy qaǵazbastylyqtan qutqarady», - deıdi M.Qozybaev atyndaǵy SQMÝ birinshi prorektory Erbol Isaqaev.

Jataqhanaǵa oryndy bólýde joǵary oqý orny basshylyǵy men stýdentterdiń ózin-ózi basqarý múshelerinen quralǵan turǵyn úı-turmystyq komıssııasy jumys isteıdi. Bul jerde barlyq ótinish qaralyp, keıin stýdenttermen kelisimshart jasalady.

Stýdentterden alynatyn aqy jataqhananyń kommýnaldyq tólemin tolyq jappaıdy. Oqý orny basshylyǵynyń málimetinshe byltyr jataqhanalarǵa 23 mln teńge jumsalsa, sonyń tek jartysyna jýyǵyn ǵana stýdentter japqan.

Ýnıversıtette qazir 7 myńnan asa stýdent bilim alady. Onyń 5 myńnan astamy kúndizgi bólimde oqıdy. Barlyǵyn jataqhanamen qamtamasyz etý múmkin emes. Sol sebepti, qazan aıynda Teatr kóshesinde jańa jataqhananyń qurylysy bastalmaq.

«Qazirgi tańda jobalyq-smetalyq qujattar ázirlenip jatyr. Jataqhananyń qurylysyn qarjylandyratyn ınvestorlarymyz bar. 300 orynǵa shaqtalady. Onyń qurylysyn 2020 jyldyń tamyz aıyna deıin aıaqtaımyz degen úmittemiz. Jobanyń quny shamamen 650 mln teńge», - deıdi Erbol Isaqaev.

360 oryndyq №3 jataqhanaǵa byltyr kúrdeli jóndeý júrgizilgen. Jylytý júıesi aýystyrylyp, jańa jıhaz ben tehnıka satyp alyndy. Stýdentter jataqhanadaǵy tazalyqqa tolyq ózderi jaýap beredi. Ár qabatta kezekshilik tizimi bar.

«Jataqhanalardyń barlyǵy taza ári jaıly. Baıqaǵanymyzdaı stýdentter ózderi tazalyqty saqtap, tártipti qadaǵalaıdy.Jýynatyn bólme, as úı bar. Reıd barysynda buzýshylyqtar, stýdenttik jataqhanalarda bógde adamdardyń zańsyz turý faktileri anyqtalǵan joq», - deıdi «QYZYLJAR – ADALDYQ ALANY» jobalyq keńsesiniń tóraǵasy Ekaterına Starostına.

Petropavl qalasynda 6 jataqhana bolsa, taǵy 14-i eldi-mekenderde ornalasqan. Olardyń barlyǵynda bul jumystar jalǵasyn tappaq.