Petropavlda tehnoekopark jobasy qolǵa alynady

PETROPAVL. KAZINFORM – Ekologııalyq máseleni sheshý maqsatynda Petropavlda tehnoekopark salý josparlanǵan.

Bul – «Radýga JShS-niń bastamasy. Petropavl qalasynyń ákimdigimen kelisilip, Mamlıýt aýdany ıAkor eldi mekeni baǵytynda arnaıy ýchaske de bólindi. Nátıjesinde bul jerde qatty turmystyq qaldyqtar polıgony men daıyn ónim shyǵaratyn qoqysty óńdeıtin zaýyt boı kótermek.

- Bizdiń kompanııa 15 jyldan artyq qoqysty – polımer men makýlatýrany óńdeýmen aınalysady. Biraq biz únemý damý jolyndamyz. Jańa joba óńirdegi ekologııalyq jaǵdaıdy jaqsartýǵa baǵyttalǵan. Óıtkeni oblysta talapqa saı keletin polıgondar men qoqysty óńdeıtin zaýyttar joq. Jobalyq-smetalyq qujattamany aldaǵy jarty jyldyń ishinde ázirleımiz, - deıdi kompanııa dırektorynyń orynbasary Dáýren Qatranov.

Tehnoekopark quramyna dárethana qaǵazy, maılyqtar men súlgiler shyǵaratyn fabrıka, kartonnan ázirlenetin buıymdar fabrıkasy men metall-plastıkalyq buıymdar zaýyty da kiredi. Jobanyń quny – 37 mlrd teńge. «Ónerkásipti damytý qory» AQ jáne «Soltústik» áleýmettik-kásipkerlik korporatsııasy» AQ arqyly qarjylandyrylmaq.

- Bul jobany júzege asyrý arqyly óńirdiń áleýmettik jáne ekonomıkalyq jaǵdaıyna áser etemiz. Tehnoekopark ashylǵan jaǵdaıda qosymsha 500 adam jańadan jumysqa qabyldanady. Osylaısha kompanııa jumysshylar sanyn 2,5 myńǵa jetkizedi. Sondaı-aq qoqys qaldyqtaryn azaıtýǵa, aýa men topyraqtyń sapasyn jaqsartýǵa, salyq túsimderin arttyrýǵa baǵyttalǵan, - deıdi Dáýren Qatranov.

Buǵan deıin Petropavlda Gınnes rekordtar kitabyna engen álemdegi eń uzyn kóshe jańǵyrtylatynyn jazǵan edik.