Petropavlda tasqynnan keıin súrilýi tıis 2 myńnan astam úıdiń 400-i buzyldy
PETROPAVL. KAZINFORM – Soltústik Qazaqstan oblysynyń ákimi Ǵaýez Nurmuhambetov kásibı mereke qarsańynda tilshiler qaýymymen kezdesip, úzdikterdi marapattady. Tasqynnan keıin qolǵa alynyp, atqarylyp jatqan jumystarmen tanystyrdy.
«Sý tasqyny kezinde jýrnalıster kúni-túni aqparat berip, apattyń ortasynda boldy. Bul - úlken erlik. Qoǵamda ózekti máselelerdi kóterip, óńirdiń damýyna qosyp júrgen úlesterińiz úshin alǵys aıtamyn», - dedi Ǵaýez Nurmuhambetov kezdesý barysynda.
Óńir basshysy Memleket basshysynyń tapsyrmasyna oraı birinshi kezekte tasqynnan zardap shekkenderge úı salyp, páterler satyp alý mindeti turǵandyǵyn aıtty. Tabıǵı apattyń barlyq saldaryn joıý úshin bar kúsh jumyldyrylǵan.
«Byltyr Petropavlda 203 eski jeke turǵyn úı súrildi. Onyń ornyna «Jaıly mektep», Kopaı shaǵyn aýdanynda nesıege beriletin kóp qabatty úı salynyp jatyr. Sońǵy 9 jylda oblys ortalyǵynda eki myńǵa jýyq úı buzyldy. Bıylǵy tasqyn bizdiń josparymyzdy, bıýdjetimizdi qaıta qaraýǵa májbúr etti. Biz tórt aıdyń ishinde sý tasqynynan keıin apatty dep tanylǵan 2029 úıdi buzyp, shyǵarýymyz qajet. Onyń 400-i súrilip, orny tazalandy. Mehanıkalyq brıgadalar jumys istep jatyr. Budan bólek qosymsha bógetterdi salý, olardyń jobalyq qujattaryn jasaý qolǵa alyndy. Tasqynnyń saldaryn tolyq bıýdjet esebinen joıý múmkin emes. Qazaqstandaǵy iri kompanııalar Prezıdenttiń úndeýin qoldap, úles qosyp jatyr. Solardyń qarjysyna úıler salynyp, páterler alyný ústinde. Infraqurylymdy jónge keltirip jatyrmyz. Birinshi sý kótergish stantsııasy boıynsha tasqynnan keıin másele bar. Osy maqsatqa 3,5 mlrd teńge qarajat taptyq, bıyl sýyq túskenge deıin bul jumystyń atqarylatynyna ýáde beremin. Petropavl burynnan bar, biraq eshqashan qalany sýmen qamtýdyń qosymsha kózi bolmaǵan. Oblys ortalyǵyn sýmen qamtý júıesiniń rezervtik kózin salý boıynsha joba jasalyp jatyr, shamamen 2,9 mlrd teńge qajet. Memlekettik saraptamanyń oń qorytyndysyn alǵan jaǵdaıda, respýblıkalyq rezervten bólingen qarajatqa jumysty bastaımyz», - dedi SQO ákimi.
Kezdesý sońynda buqaralyq aqparat quraldary ókilderi SQO ákiminiń Qurmet gramotasymen, alǵys hattarmen marapattaldy.
Buǵan deıin SQO-da joǵalǵan búldirshinniń úıinen 5 shaqyrym jerden aman-esen tabylǵanyn jazǵan edik.
