Petropavlda tasqynnan keıin súrilgen úılerdiń ornyna ne salynady
PETROPAVL. KAZINFORM – Petropavldaǵy Oıqala men Bylǵary zaýyty shaǵyn aýdandarynda aýqymdy jumys bastaldy.
Bul eki shaǵyn aýdan byltyr sýǵa ketip, saldarynan mundaǵy úılerdi buzyp alýǵa týra keldi. Turǵyndary jańadan paıda bolǵan «Birlik» shaǵyn aýdanyna kóshirildi.
Soltústik Qazaqstan oblysy ákimdiginiń málimetinshe, endi bul bosaǵan jerlerde 74 skver paıda bolmaq. Jobany júzege asyrýǵa óńirdiń barlyq aýdandary men qalalyq uıymdary atsalysady.
- Birlesken kúsh-jigermen 2 myń aǵash otyrǵyzylyp, shaǵyn arhıtektýralyq formalar, oryndyqtar, jaryqtandyrý, serýendeý aımaǵy ornatylady. Fýtzalǵa arnalǵan eki modýldyq sportzal salynyp, balalar men sport alańdary, voleıbol jáne fýtbol alańdary paıda bolady, - dep jazdy óńir basshysy Ǵaýez Nurmuhambetov áleýmettik jelidegi paraqshasynda.
Álemdegi eń uzyn jaıaý júrginshiler kóshesi sanalatyn Qazaqstan Konstıtýtsııasy kóshesi de qaıta jańǵyrtylyp jatyr. Joba úsh kezeńde júzege asady. Qazirgi ýaqytta Astana kóshesinen Parkovaıa kóshesine deıingi bólikte ınjenerlik jeliler men tas tósenishterdi aýystyrý, kógaldandyrý jáne ǵımarattardyń qasbetin biryńǵaı sáýlettik stılde árleý jumystary bastaldy.
Budan bólek taǵy bir mańyzdy joba — «Maǵjan ortalyǵy» qurylmaq. Mádenı-aǵartýshylyq baǵyttaǵy ortalyqtyń janyna jańa jaıly skver salynyp, qala turǵyndarynyń súıikti demalys ornyna aınalady.
Buǵan deıin Petropavlda fýtbol akademııasynyń qurylysy bastalatynyn jazǵan edik.