Petropavlda tártip saqshysyna para bermek bolǵan er adam sottaldy

PETROPAVL. QazAqparat – Petropavlda patrýldik polıtsııa qyzmetkerine 5 myń teńge para bermek bolǵan er adam sottaldy, dep habarlaıdy QazAqparat tilshisi.

Petropavl qalalyq soty laýazymdy tulǵaǵa para usynǵan K.-ǵa qatysty qylmystyq isti qarady.

Sot materıaldaryna júginsek, 4 aqpan kúni Petropavl turǵynyn ákimshilik jaýapkershilikke tartpaýy úshin patrýldik polıtsııa ınspektoryna 5 myń teńge para berip jatqan jerinen sybaılas jemqorlyqqa qarsy qyzmet ustady.

Prokýror sottalýshyǵa aıyppul salyp, ómir boıyna memlekettik qyzmette jumys isteý quqyǵynan aıyrýdy surady. Qylmystyń bul túrine para somasynan 20-30 ese mólsherinde artyq aıyppul salý nemese 5 jylǵa deıin bas bostandyǵynan aıyrý jazasy qarastyrylǵan. Sondaı-aq belgili bir laýazymdy qyzmetterdi atqarýǵa jáne belgili bir kásippen aınalysýǵa ómir boıyna tyıym salynady.

K. taǵylǵan aıyppen kelisip, óz kinásin tolyq moıyndady jáne istegen isine ókinish bildirdi. Kinásin aýyrlatatyn jaǵdaılar anyqtalmady.

Sot úkimimen oǵan para somasynyń 11,25 eselengen mólsherinde, ıaǵnı 56 250 teńge aıyppul salyndy. Sottalǵanǵa ómir boıy memlekettik qyzmette qyzmet atqarýǵa tyıym salyndy.