Petropavlda sý tasqynynan zardap shekkender qandaı somaǵa baspana ala alady

PETROPAVL. KAZINFORM – Petropavlda birer kúnde sý tasqynynyń ekinshi tolqyny bastalady. Biraq mamandardyń boljamynsha, bul joly onyń qarqyny tómen, qatty jaıylmaıdy. Sol sebepti qazir sýy tartylǵan aýmaqtardaǵy turǵyn úılerge az ýaqyt ishinde tehnıkalyq zertteý júrgizý mindeti tur.

Oblystyq ákimdikte ótken jıynda tasqynnyń zardabymen kúresý joldary aıtyldy. Birinshi kezekte úıinen aıyrylǵandardy baspanamen qamtý máselesi tur. Petropavlda 2 myńǵa jýyq turǵyn úı sý astynda qaldy. Sonyń jartysynan astamy Oıqala aýdany turǵyndarynyń baspanalary. Oblys turǵyndaryna birjolǵy tólemge 700 mln astam teńge bólingen. Qazirgi ýaqytta 957 adam tıesili kómekti aldy. Qalǵandary apta sońyna deıin almaq.

«Qazir Oıqala aýdanynda 12 jeke turǵyn úıge tehnıkalyq zertteý júrgizildi. Turǵyn úı qorynan 2 jáne 3 bólmelik 18 páter daıyndaldy. Kommertsııalyq turǵyn úılerden 197 páterlik pýl quryldy. Qurylys kompanııalarymen memorandým jasaldy. Páter baǵasy shamamen 22 mln teńgeden aspaýy tıis. 72 páterlik toǵyz qabatty úıdiń jobalyq-smetalyq qujaty ázir. Onyń bir sharshy metri 320 myń teńge bolmaq. Taǵy 5 bes úı salý josparda bar. Petropavldaǵy rıeltorlarmen de kelistik. Sondaı-aq jeke turǵyn úıler salý úshin Solnechnyı kentinen 100 jer ýchaskesi bólindi», – dedi Petropavl qalasynyń ákimi Serik Muhamedıev.

Soltústik Qazaqstan oblysynyń ákimi aldaǵy eki-úsh aıdyń ishinde úısiz qalǵan adamdardyń baspana máselesin sheshý mindetin qoıdy. Qazir zardap shekkenderdiń basym bóligi jataqhanalarǵa ornalastyrylǵan.

Buǵan deıin tasqynnyń saldaryn joıýǵa jáne jóndeýge kelmeıtin úılerdi buzýǵa óńirde 100-den astam mehanıkalyq brıgada qurylatynyn aıtqan edik.