Petropavlda psıhdıspanserde esepte turatyn adam avtobýs júrgizip kelgen
Petropavlda psıhıkalyq densaýlyq ortalyǵynyń esebine alynǵan er adam qala kóshelerinde avtobýs júrgizip, jolaýshy tasymaldaǵan. Bul derek Soltústik Qazaqstan oblystyq prokýratýrasy júrgizgen tekseris kezinde anyqtaldy, dep habarlaıdy Kazinform.
Búgin oblystyń qadaǵalaý organy zańdylyqty, quqyqtyq tártipti jáne qylmysqa qarsy kúresti qamtamasyz etý jónindegi úılestirý keńesiniń otyrysyn ótkizdi.
Jıynda ótken jyl men bıylǵy 9 aıdaǵy óńirdegi jol-kólik oqıǵalary men jaraqattanýdy azaıtý boıynsha ýákiletti organdardyń jumysy qorytyndylandy.
Keńes barysynda SQO-da jol-kólik oqıǵalary sany — 17,5%, al zardap shekken adamdar sany — 16,8% óskeni atap ótildi.
«Jol qozǵalysyna qatysýshylar tártibiniń tómendigi, ýákiletti organdar tarapynan zańmen qarastyrylǵan sharalardy qabyldamaý jol-kólik oqıǵalarynyń negizgi sebepteri bolyp otyr. Tekseris barysynda jol qozǵalysy salasyndaǵy zańnama talaptaryn júıeli buzý faktileri anyqtaldy. Jergilikti atqarýshy organdar „Jol qozǵalysy týraly“ QR Zańynyń 24-babynyń talaptaryna qaramastan, polıtsııa organdarynyń 79 jazbasha nusqamasy boıynsha olardy joıý boıynsha shara qabyldamaǵan» delingen prokýratýranyń habarlamasynda.
Máselen, kún saıyn 6 myńnan astam bala baratyn óńirdegi 83 bilim mekemesiniń janynda tıisti jol belgileri bolmaǵan.
Medıtsınalyq qarsy kórsetilimder boıynsha kólik júrgizýge tyıym salynǵan 138 adamnyń júrgizýshi kýáligi bolǵan. Qzair olardyń kólik basqarý quqyǵyn toqtatý boıynsha jumys júrgizilip jatyr.
«Oblys ortalyǵynda marshrýttyq avtobýstyń júrgizýshisi osy jyldyń 2 mamyrynan bastap psıhıkalyq densaýlyq ortalyǵynda esepke alynǵan, soǵan qaramastan avtobýsty basqardy, osylaısha qala turǵyndarynyń ómiri men densaýlyǵyna qaýip tóndirdi» deıdi prokýratýra qyzmetkerleri.
Talqylaý qorytyndysy boıynsha ýákiletti organdarǵa qosymsha jaıaý júrginshiler ótkelderin salý máselesin pysyqtaý usynyldy.
Oblystyń polıtsııa departamentine jergilikti atqarýshy organdarmen birlesip apattyq-qaýipti jol ýchaskeleriniń reestrin jasaý, problemalardyń tizbesin aıqyndaý jáne olardy sheshý usynyldy.
