Petropavlda páterde jalǵyz qalǵan úsh jasar bala órtten kóz jumdy
Petropavlda kóp qabatty úıdiń páteri órtenip, úıde jalǵyz bolǵan 3 jasar bala mert boldy, dep habarlaıdy Kazinform.
Soltústik Qazaqstan oblysy Tótenshe jaǵdaılar departamenti baspasóz qyzmetiniń málimetinshe, búgin saǵat 10:00 shamasynda «101» dıspetcherlik nómirine Petropavldaǵy Jýkov kóshesi, 23 mekenjaıyndaǵy páterlerdiń birinde órt shyqqandyǵy týraly habar tústi. Oqıǵa ornyna jetken órt sóndirýshiler páterdegi zattardyń – kıim-keshek pen jıhazdyń janyp jatqanyn kórdi. Úıde 3 jasar bala jalǵyz bolǵan.
"Sábıdi alyp shyǵyp, jedel járdem qyzmeti brıgadasyna tabystadyq. Alaıda olar reanımatsııalyq kómek kórsetkenimen, balany aman alyp qala almady. Órt 14 mınýt ishinde sóndirildi. Órttiń shyǵýyna ne sebep bolǵany anyqtalyp jatyr. SQO TJD balalardy úıde jalǵyz qaldyrmaýǵa keńes beredi. Órt qaýipsizdigin saqtańyzdar", - deıdi Petropavl qalalyq tótenshe jaǵdaılar basqarmasynyń basshysy Nazymbek Elemesov.
SQO Densaýlyq saqtaý basqarmasy baspasóz qyzmetiniń málimetinshe, bala janǵan zattardyń ýly ıisinen ýlanǵan. Úıden alyp shyqqanda sábıde tiri jannyń belgileri bolmaǵan. Jedel járdem qyzmeti balanyń ómirine arasha túsý úshin 40 mınýt alysqanymen, ol nátıje bermedi.
