Petropavlda oq tıgen áskerı qyzmetshi aýrýhanada qaıtys boldy
Petropavlda Ulttyq ulannyń 6637 áskerı bóliminiń jaýyngeri qyzmet barysynda jaralanyp, aýrýhanada kóz jumdy, dep habarlaıdy Kazinform.
Oqys oqıǵanyń bolǵanyn QR Ulttyq ulany baspasóz qyzmeti rastady.
«12 qarasha kúni 6637 áskerı bólimniń kelisimshart boıynsha qyzmet etetin áskerı qyzmetshisi áriptesiniń abaısyzda oq atýynan jaralandy. Er adam shuǵyl túrde medıtsınalyq mekemege jetkizildi, alaıda áskerı qyzmetshini aman alyp qalý múmkin bolmady», - delingen habarlamada.
Qazirgi ýaqytta qyzmettik tergeý júrip jatyr, oqıǵanyń mán-jaıyn anyqtalý ústinde.
Petropavl qalasynyń áskerı prokýrory Meıirjan Qasymjanov osy oqıǵaǵa túsinik berdi.
«Qaıtys bolǵan 6637 áskerı bóliminiń serjanty Chýjıkov. QR ІІM ortalyq-óńirlik áskerı tergeý basqarmasynyń Petropavl toby QR qylmystyq kodeksiniń 462 baby, 2 bóligi boıynsha sotqa deıingi tergeýdi bastady. Osy faktige qatysty tergeý amaldary júrip jatyr. Tıisti sot saraptamalary taǵaıyndaldy. Áskerı qyzmetshi oq jaraqatyn alǵannan keıin áriptesteri ony birden medıtsınalyq mekemege jetkizdi, biraq reanımatsııalyq sharalar júrgizilgenimen dárigerler onyń ómirine arasha túse almady. Ózge aqparat Qylmystyq-protsesýaldyq kodekstiń 201 babyna sáıkes jarııa etilmeıdi», - dedi Meıirjan Qasymjanov.
