Petropavlda nemis kompanııasy aýyl sharýashylyǵy tehnıkasyn shyǵaratyn zaýyt ashpaq

PETROPAVL. QazAqparat – Soltústik Qazaqstan oblysynda zamanaýı aýyl sharýashylyǵy tehnıkasyn shyǵaratyn nemistiń «Claas» kompanııasy óz zaýytyn ashatyn boldy. Kelissózder óz nátıjesin berip, eki jaqty tıimdi kelisimshartqa qol qoıyldy, dep habarlaıdy QazAqparat tilshisi.

SQO ákimi baspasóz qyzmetiniń málimetinshe, «Claas» nemis kompanııasymen SQO aýmaǵynda zaýyt ashý jaıynda kelissózder 1,5 jyl boıy júrgizildi. Nátıjesinde aýyl sharýashylyǵy tehnıkasyn óndiristik qurastyrý jóninde kelisimshartqa qol qoıyldy.

Petropavlda bolashaq zaýyttyń ǵımaraty kúrdeli jóndeýden ótip jatyr. Bul jerde kombaındar, traktorlar jáne egis keshenderi qurastyrylatyn bolady.

«Nemis kompanııasynyń basshylyǵymen kezdesip, barlyq bıznes modelderdi kórsettik. Kompanııa qarajat salǵannan keıin odan paıda kórgisi keledi ǵoı. Mysaly «Claas» kompanııasynyń zaýyttary 10 jyl buryn Reseıde ashylǵan. Ózbekstanda jumys istep jatyr. Nege bizde joq?! SQO-da aýyl sharýashylyǵy salasynyń kólemi úlken. Biz jyl saıyn 300 kombaın emes, arzan bolsa 500 kombaın alatyn bolamyz. Alatyn múmkindikterimiz bar. «QazAgroQarjy» arqyly lızıngpen birneshe jylǵa tómen paıyzdyq mólsherlememen alýǵa bolady. Osydan birneshe jyl buryn aýyl sharýashylyǵy tehnıkasyn alǵan kezde dıqandar alǵashqy salym - 25 % berýge mindetti edi. Qazir ol aqshany Úkimet ózi tólep otyr. Osy barlyq tıimdi tustaryn kórsetip, nemis kompanııasymen kelisimshartqa qol qoıdyq», - deıdi zaýyttyń qurylys jumystaryn kórgen SQO ákimi Qumar Aqsaqalov.

SQO dıqandary qazirdiń ózinde «Claas» kompanııasynyń 500-den astam tehnıkasyn, sonyń ishinde 100 traktor, 311 kombaın jáne 100-den artyq túrli aýyl sharýashylyǵynda qajet ónimin qoldanyp júr.

«Aýyl sharýashylyǵy tehnıkasyn shyǵaratyn álemge tanymal kompanııa oblys ekonomıkasyna 3 mlrd teńgeden astam qarjy salmaq. SQO dıqandary sapaly tehnıkany arzan baǵaǵa alatyn bolady. Eger buryn traktor 153-ten 164 mln teńgege deıin, kombaındar 136-171 mln teńge aralyǵynda tursa, endi olardyń baǵalary 50% deıin arzan bolady. ıAǵnı 12% QQS, 5% keden salyǵy jáne 35% ınvestıtsııalyq sýbsıdııa tehnıka qunynan alynady. Sondaı-aq «Claas» bastan-aıaq servıstik qyzmet kórsetedi», - deıdi óńir basshysy.

Kásiporynda alǵashqy kezeńde 100 jumys orny ashylady. Kompanııa zaýytty ári qaraı damytý úshin tehnıkalyq kadrlardyń daıyndyǵymen aınalysady. Jylyna 300 aýyl sharýashylyǵy tehnıkasyn shyǵarýdy josparlaǵan.