Petropavlda múgedektigi bar adamdardyń bı úıirmesi jabylyp qaldy
PETROPAVL. KAZINFORM – Petropavldaǵy múmkindigi shekteýli jandardyń «Úmit» klýby janynan jumys istep kelgen sporttyq bal bıi sektsııasy jabylyp qaldy.
«AMANAT» partııasy Soltústik Qazaqstan oblystyq fılıalynda «Kedergisiz keleshek» jobasy aıasynda qoǵamdyq qabyldaýy ótti. Partııa ókilderi men memlekettik organdarǵa 4 adam júgindi. Olar 2-shi toptaǵy múgedekter úshin jumys ýaqytyn qysqartý, múgedektikti berý protsesin jedeldetý jáne gıgıena quraldarymen, dári-dármekpen qamtamasyz etý máselelerin sheshýge kómek surady.
Petropavldyń 23 jastaǵy turǵyny Mıra Ábıtovanyń 2-shi top múgedektigi bar. Ol sońǵy jyldary №13 mektepte bı ónerimen shuǵyldanyp kelgen. Sporttyq bal bıi boıjetkenniń qam kóńilin bir sát seıiltip, qýanysh syılaıtyn. Endi bul sektsııa jabylyp qalǵan. Oblystyq máslıhat depýtaty Vladımır Ermannyń aıtýynsha, arbada oryndalatyn sporttyq bal bıi sportqa qaraıdy, bul durys emes, ol mádenıet salasyna qaraýy tıis. Máseleniń bir mánisi osynda.
«Bul sektsııada shyn máninde eki jup qana shuǵyldanyp keldi. Alaıda «Úmit» sport klýby sport basqarmasyna qaraǵandyqtan sporttyq bal bıi baǵyty endi bul jerde bolmaıdy. Sondaı-aq klýbta bı jattyqtyrýshysy jumys isteı almaıdy, óıtkeni ol mádenıet salasyna jatady. Eger mádenıet basqarmasy nemese qalalyq mádenıet bólimi bul sektsııany óz qamqorlyǵyna alsa bul máseleni sheshýge múmkindik bar», - deıdi Vladımır Erman.
Bul máseleniń sheshilýine amanattyqtar at salyspaq. Partııa ókilderiniń pikirinshe, ákimdik bul máseleni sheship, bı úıirmesine oryn tabýǵa kómektese alady.
«Qala ákimimen, ákimniń orynbasarymen sóılesip, aqyldasamyz. Arnaıy jabdyqtar men arbalar bar, endi tek oryn tabý qajet. Petropavl ákimdiginde mádenıet pen sport bir bólimge biriktirilgen. Biz osy problemany nazarda ustaıtyn bolamyz», - dedi «AMANAT» partııasynyń SQOF atqarýshy hatshysy Jeńis Asanov.
Buǵan deıin Petropavldaǵy jetkinshekter úıi bıyl 72 mln teńgege jóndelgenin jazǵan edik.
