Petropavlda qutqarýshylar mereke qarsańynda pırotehnıkany durys qoldaný talaptaryn eske saldy
Petropavl qalalyq tótenshe jaǵdaılar basqarmasynyń bastyǵy Nazymbek Elemesovtyń aıtýynsha, órt - baqylaý turǵysynan rettelmeıtin sala. Sondyqtan qaýipsizdik erejelerin saqtaý arqyly ǵana onyń aldyn alýǵa bolady. Jańa jyl tynysh ótýi úshin ásirese pırotehnıkalyq buıymdardy paıdalaný kezinde órt qaýipsizdigi erejelerin saqtaý qajet.
«Otshashý-feıerverkterdi satyp alǵanda eń aldymen ónimniń sertıfıkatyna nazar aýdarǵan jón. Pırotehnıkany saqtaý jáne satý merzimine nazar aýdarýdy umytpańyz: eger taýardyń merzimi ótip ketse, ony qoldanýǵa bolmaıdy. Qaptama bútin, jyrtylmaǵan bolýy kerek. Pırotehnıkany iske qosqan kezde temeki shegýge qatań tyıym salynady. Turaqta turǵan kólikterdiń janynda atýǵa bolmaıdy. 100 metr radıýsta órt qaýipti nysandar bolmaýy tıis. Kórermender otshashýdyń ushyrý alańynan 35-50 metr qashyqtyqta bolýy kerek jáne jel olarǵa tútin men otshashýdyń janbaǵan bólikterin ushyrmaýy úshin mindetti túrde jel jaǵynda turǵan jón. Ónimdi qolda ustap iske qosýǵa tyıym salynady», - deıdi Nazymbek Elemesov.
Mamannyń aıtýynsha, janǵysh zat bar jerde ashyq otty paıdalanýǵa bolmaıdy. Ushqyn - bul ashyq ot. Temperatýrasy 2 myń gradýsqa jetedi. Sondyqtan ony janǵysh materıaldardan alys jerde qoldaný kerek. Pırotehnıkanyń kez-kelgen túri adam densaýlyǵyna eleýli zııan keltiretin qaýipti qural ekenin este ustaǵan jón.
«Pırotehnıkalyq buıymdar tek respýblıkalyq zańnamada belgilengen tártippen bekitilgen normatıvtik qujattardyń talaptaryna jaýap beretin saýda oryndarynda ǵana satylýy tıis. Pırotehnıkany zańsyz satý faktileriniń jolyn kesý maqsatynda Departament qyzmetkerleri polıtsııa ókilderimen birlesip, pırotehnıkalyq buıymdardy saqtaý jáne satý oryndary boıynsha reıdter júrgizedi. Tekserýler kezinde ónimniń sapasyna, sertıfıkattyń bolýyna, saýda ornynyń saqtaý jáne sáıkestik Erejelerine saı bolýy tekseriledi», - deıdi Nazymbek Elemesov.
Qazirgi ýaqytta Petropavlda jedel toptar quryldy, jumysqa tótenshe jaǵdaılar departamentiniń qyzmetkerleri jumyldyryldy.
«Óz tarapymyzdan órttiń aldyn alýdyń mańyzdy sharty - órt qaýipsizdigi erejelerin saqtaý jáne oryndaý bolyp tabylatynyn eske salǵym keledi.
Shyrshany jylytý qurylǵylarynan múmkindiginshe alys ornatyńyz, ony tirekke myqtap bekitińiz.
Shyrshany ot shamdarymen jáne tez tutanatyn áshekeılermen, qaǵaz gırlıandalarmen bezendirmeńiz. Tek zaýytta jasalǵan elektr gırlıandalaryn qoldanyńyz. Sapa sertıfıkattary men nusqaýlyqtary joq pırotehnıkalyq buıymdardy satyp almańyz. Úı ishinde pırotehnıkalyq ónimderdi paıdalanbańyz. Otshashýlar men pırotehnıkalyq buıymdardy qurylystardan qaýipsiz qashyqtyqta iske qosyńyz», - deıdi maman.
Foto: proturizm.club
