Petropavlda kórneki aqparattaǵy qatelikti túzetpegenderge ákimshilik jaza qoldaný algorıtmi bekitilmegen
PETROPAVL. KAZINFORM – Petropavlda byltyr til mamandary 80 nysanǵa monıtorıng júrgizip, zań buzýdyń 30 deregin anyqtady. Qatege jol bergender eskertýmen ǵana shektelgen.
Petropavldaǵy keı saýda oryndaryndaǵy kórneki aqparat bir jónge kelmeı qoıdy. Oblys ortalyǵyndaǵy «Bereke» shaǵyn aýdanynyń turǵyny Jaınagúl Temirhanovanyń aıtýynsha, keı aýdarmalardy kórip, ne kúlerińdi, ne jylaryńdy bilmeısiń.
«Staqandy «shynydan rahattanyńyz» dep aýdarǵan. Mundaı qateler órip júr. Ashylǵan betti kóre salysymen ákimshiligin eskerttim. Biraq sózimdi qulaǵyna qystyrǵan adam bolmady. Úıimniń janynda tur, sondyqtan barmaı qoımaýǵa taǵy bolmaıdy. Kelgen saıyn kóńilim qulazyp shyǵady. Іshindegi qyzmetkerleriniń basym bóligi ózge ult ókili. Olar baıybyna barmaı, arnaıy qosymshalar arqyly aýdara salady. Eshkim tekserip jatqan joq», - deıdi Petropavl turǵyny Jaınagúl Temirhanova.
Syrtqy jarnama men kórneki aqparattyń durys jazylýyn qadaǵalaý Petropavl qalasy ákimdiginiń mádenıet, tilderdi damytý, dene shynyqtyrý jáne sport bóliminiń quziretinde.
Mamandardyń aıtýynsha, monıtorıng júrgiziledi, ádistemelik jáne túsindirý jumystary da qolǵa alynǵan.
«Severnyı» saýda jelisindegi kórneki aqparat mátinderine monıtorıng jasaldy, anyqtalǵan qatelerdi túzetip jatyr. Jalpy olqylyqty joıýǵa 30 kún merziminde ýaqyt beriledi.
«Qazaqstan Respýblıkasyndaǵy til týraly» Zańnyń 21 babyna sáıkes habarlandyrýlar, jarnama, preıskýranttar, baǵa belgileri, mázirler, kórsetkishter jáne basqa da kórneki aqparat memlekettik tilde, qajet bolǵan jaǵdaıda orys nemese basqa tilderde kórsetiledi.
Monıtorıng barysynda baıqaǵanymyz – negizinen mátinder tek orys tilinde ornalastyrylady nemese aýdarmalar sózbe-sóz maǵynada qoldanylady», - deıdi Petropavl qalasy ákimdiginiń mádenıet, tilderdi damytý, dene shynyqtyrý jáne sport bóliminiń basshysy Rýslan Seńkibaev.
Kórneki aqparatty tekserýge monıtorıng jyl boıy júrgiziledi. Byltyr 80 nysandy qamtyp, olarda zań buzýdyń 30 deregin anyqtaǵan. Odan bólek turǵyndardan 18 ótinish kelip túsken. Búginde qatelikterdiń bári túzetilgen.
«Ákimshilik quqyq buzýshylyq týraly kodekstiń 75-baby, 3-tarmaǵyna sáıkes derektemeler men kórneki aqparatty ornalastyrý jónindegi talaptardy buzǵany úshin eskertý beriledi, al ákimshilik jaza qoldanylǵannan keıin bir jyl ishinde qaıtalap jasalǵan is-áreket laýazymdy adamdarǵa, shaǵyn kásipkerlik sýbektilerine nemese kommertsııalyq emes uıymdarǵa – 5, orta kásipkerlik sýbektilerine – 10, iri kásipkerlik sýbektilerine 25 AEK mólsherinde aıyppul salynady. Alaıda búgingi kúni ákimshilik aıyppul salý algorıtmi bekitilmegen, sondyqtan bul quqyq normasy qoldanylmaıdy. Osyǵan baılanysty Petropavl ákimdigi SQO ákimdiginiń mádenıet, tilderdi damytý jáne muraǵat isi basqarmasyna, Petropavl prokýratýrasyna túsindirý týraly hat joldady», - deıdi Rýslan Seńkibaev.
Bıyl til bólimi mamandary «Dostyq moll», «Sıtı moll», «Rahmet», «Taıga» saýda ortalyqtarynda, «Aısberg», «Okean», «Semeınyı», «Ot ı do», «Sokol», «Eýrazııa bazary», «Altyn arman», «TDK» saýda úılerinde jáne Jambyl, Internatsıonal, Býketov jáne Nazarbaev kóshelerinde monıtorıng júrgizýdi josparlaǵan.
