Petropavlda qoqysty qaıta óńdeıtin klaster qurylady

PETROPAVL. KAZINFORM – Petropavlda turmystyq qatty qaldyqtar polıgony jáne qoqysty qaıta óńdeý máselesin sheshý maqsatynda Tehnoekopark salynady.

Soltústik Qazaqstan oblysy ákimdiginde ótken jıynda Tehnoekopark jobasy tanystyryldy. 

— Qoǵamnyń negizgi problemalarynyń biri — ekologııalyq jaǵdaıdyń nasharlaýy. Óńirlerde polıgondar men qoqys óńdeý zaýyttary joq. Petropavldaǵy polıgonnyń paıdalaný merzimi 2025 jyldyń jeltoqsanynda aıaqtalady.

Osyǵan baılanysty biz qatty turmystyq qaldyqtar polıgonyn jáne qoqysty kádege asyratyn zaýytty salýdy usyndyq. Tehnoekopark — klaster negizinde jumys istep, birneshe baǵytty qamtıdy, — deıdi jobany usynýshy «Radýga» JShS dırektorynyń orynbasary Dáýren Qatranov.

Tehnoekopark aıasynda tórt joba iske qosylady. Olar: túıirshikti shıkizat alý úshin qatty turmystyq qaldyqtardy suryptaýmen jáne bastapqy óńdeýmen aınalysatyn «Qoqys óńdeý zaýyty»; dárethana qaǵazy, qaǵaz súlgiler, maılyqtardy qaıta óńdelgen qaǵazdan jáne makýlatýradan shyǵaratyn «Qaǵaz ónimderi fabrıkasy»; gofr karton jáne gofr ydys sııaqty qaıta óńdelgen kartonnan jasalǵan buıymdardy shyǵarýǵa mamandanǵan «Karton buıymdary fabrıkasy»; eýropoddon, jıhaz, avtobólshekterdi jáne aýyl sharýashylyǵy tehnıkasyna arnalǵan qosalqy bólshekterdi qaıta óńdelgen plastıkten jasaıtyn «Metall-plastıka buıymdary zaýyty». 

— Eki óndiris orny «Qyzyljar» arnaıy ekonomıkalyq aımaǵynyń aýmaǵynda ornalasady. Jalpy aýdany 13 myń jáne 18 myń m2 bolady. Jobanyń jalpy quny shamamen 49 mlrd teńge. Osy birlesken úlken jobany júzege asyrý barysynda ónim kólemin birneshe ese arttyramyz. Bul jobany iske asyrý óńirdiń ekonomıkalyq jáne áleýmettik damýyna aıtarlyqtaı áser etedi, — deıdi Dáýren Qatranov.

Buǵan deıin Tehnoekopark ashylǵan jaǵdaıda qosymsha 500 adam jańadan jumysqa qabyldanatynyn jazǵan edik.