Petropavlda qylmys kórsetkishi 23 paıyzǵa tómendedi
PETROPAVL. KAZINFORM – 2023 jyldyń qorytyndysy boıynsha SQO oblys ortalyǵynda tirkelgen qylmystardyń jalpy kórsetkishi 22,8% paıyzǵa tómendedi. Osyndaı aqparatty qala turǵyndaryna Petropavl qalasy polıtsııa basqarmasynyń bastyǵy Marat Jumalıev 2023 jylǵy Polıtsııa basqarmasy jedel-qyzmettik qyzmetiniń qorytyndylaryna arnalǵan eseptik kezdesý barysynda aıtty.
Onyń aıtýynsha, urlyq sany — 30,2 paıyzǵa, onyń ishinde páter urlyǵy — 29,5%, tonaý 16,2% azaıǵan.
«Qylmys kórsetkishiniń oń dınamıkasyna júrgizilip jatqan profılaktıkalyq jumystar, túngi ýaqytta halyqqa qyzmet etin avtopatrýlder sanynyń artýy, oıyn-saýyq mekemelerinde júrgizilgen profılaktıkalyq jumystar áser etip otyr. Kóshedegi qylmys 13,9 paıyzǵa tómendedi», — dedi Polıtsııa basqarmasynyń bastyǵy Marat Jumalıev.
Petropavl tártip saqshylaryn ınternettegi alaıaqtyq máselesi alańdatyp otyr. Qylmystyń atalǵan túrimen kúres barysynda halyqqa túsindirý jumystaryn júrgizýge erekshe nazar aýdarylmaq. 7 myń aqparattyq túsindirme paraqshalar japsyrylyp, 18 myńnan astam broshıýralar taratyldy. WhatsApp messendjerindegi úı chattarynda jadynamalar taratylyp, 100-den astam iri uıymdarda dárister ótkizý qolǵa alynǵan. Mamandar turǵyndarǵa alaıaqtardyń aıla-tásilderin túsindire otyryp, júzdegen zeınetkerlerdiń úıine arnaıy baryp, nasıhat jumystaryn uıymdastyrǵan. Tártip saqshylarynyń pikirinshe, budan shyqqan nátıje de joq emes. Ótken jyly 825 qala turǵyny eskertý habarlamalardyń arqasynda alaıaqtardyń aldaý shemalaryna tosqaýyl qoıa bildi.
Eseptik kezdesý barysynda qalalyq PB basshysy abattandyrý erejelerin saqtaý, nashaqorlyq pen esirtki qylmysyna qarsy kúres jáne quqyqtyq tártiptiń jaı-kúıi syndy ózge de ózekti taqyryptarǵa toqtaldy.
Marat Jumalıevtiń málimdeýinshe, shaharda 336 jańa beınekamera ornatylyp jatyr. Olardyń ornalasýy jedel jaǵdaıdy taldaý negizinde tańdalady.
Petropavldyqtar túrli saýaldar qoıyp, jol qaýipsizdigin qamtamasyz etý, áleýmettik jelilerde polıtsııamen keri baılanys týraly da nazyn aıtty. aıtty. Usynystardyń eshqaısysy da jaýapsyz qalǵan joq. Barlyq suraqtar polıtsııanyń quzyreti sheginde sheshim tabý úshin nazarǵa alyndy. Sondaı-aq, ýchaskelik ınspektorlarǵa birden birneshe alǵys pikirler kelip tústi.
Eske sala keteıik, buǵan deıin Petropavl polıtseıleri úsh kúnde 8 ınternet-alaıaqtyq faktisin áshkerelegenin jazǵan bolatynbyz. Jaqynda SQO tártip saqshylary ınternet-alaıaqtyqtyń aldyn alý úshin jańa tásilge kóshti.
