Petropavlda keler jyly bıýdjettiń 80 mln teńgesine 100 adamdy qaıta oqytý josparlanǵan

PETROPAVL. QazAqparat – Petropavlda keler jyly 80 mln teńgege 100 adam qaıta daıarlaý kýrsynan ótpek, al 60 adamǵa óz isin ashýǵa 82 mln teńge shamasynda memlekettik grant berý josparlanǵan, dep habarlaıdy QazAqparat tilshisi.

Petropavl ákimi Rýslan Ańbaevtyń aıtýynsha, qala turǵyndaryn jumyspen qamtý maqsatynda birneshe memlekettik baǵdarlama jumys isteıdi.

Sonyń biri – kásipke oqytý. Bıyl 86 jumyssyz oqýǵa jiberilse, sonyń 16-sy jumys berýshiniń bazasynda jańa kásipti meńgerdi. Olar tiginshiler, elektrıkter, kondıterler, aspazdar men satýshylar.

Keler jyly jergilikti bıýdjetten 80,2 mln teńge bólip, 100 adamdy oqytyp, jańa mamandyq berý josparlanǵan.

Al «Bastaý Bıznes» baǵdarlamasy boıynsha bıyl 260 adam kásipkerliktiń negizderin úırendi. Sonyń 91-i - 101,2 mln teńgeniń grantyn aldy. Olardyń 54-i - jas sanatyna jatatyndar.

Keler jyly osy maqsatqa 82,2 mln teńge memlekettik grant bólinip, 60 adamǵa berilmekshi.

«Budan basqa «Jastar tájirıbesi», «Alǵashqy jumys orny» baǵdarlamalary jumys isteıdi. Jastarǵa arnalǵan bul eki baǵdarlamamen 220 adam qamtyldy.

Al zeınet jasyna jaqyndaǵandardy jumyspen qamtýǵa arnalǵan joba aıasynda 6 adam eńbekke aralasty. Keler jyly osy úsh baǵdarlamanyń ıgiligin 240 adam kórmek, júzege asyrýǵa respýblıkalyq bıýdjetten 287,9 mln teńge qarastyrylǵan», - deıdi Rýslan Ańbaev.

Nátıjesinde bıyl 4,8 myń adam turaqty, 1,2 myńnan astam adam ýaqytsha jumyspen qamtyldy.