Petropavlda qazaq tiliniń onlaın kýrsy ashyldy

PETROPAVL. QazAqparat – Petropavlda til úırenem deýshilerge qazaq tiliniń onlaın kýrsy bastaldy. Jańa sabaqtar aptasyna eki ret shyǵyp turmaq, dep habarlaıdy QazAqparat tilshisi.

Qazaq tiliniń onlaın kýrsyn ashýǵa Petropavl qalalyq ákimdiginiń mádenıet jáne tilderdi damytý bólimi muryndyq bop otyr. Alǵashqy dáris 2 naýryz kúni qalalyq ákimdiktiń resmı saıty arqyly kórermenge jol tartty.

«Pandemııaǵa baılanysty qazaq tilin qashyqtan oqytýǵa kóshtik. Sabaqtar aldyn ala jazylady. Turǵyndarǵa negizinen kúndelikti aýyzeki tilde qoldanylatyn sózderdi úıretemiz. Jańa dáristi aptasyna eki ret saıtqa ornalastyramyz. Ár sabaqta belgili bir taqyrypty qamtımyz. Kýrs qazaq tilin múlde bilmeıtinderge arnalǵan», - deıdi Petropavl qalalyq ákimdiginiń mádenıet jáne tilderdi damytý bóliminiń jetekshisi Álııa Beısenova.

Uıymdastyrýshylardyń aıtýynsha, bastapqyda 24 sabaq jazyp alynbaq. Ustaz – Petropavldaǵy Nazarbaev zııatkerlik mektebiniń qazaq tili men ádebıet pániniń oqytýshysy.

«Buǵan deıin qazaq tili kýrsy dástúrli formatta uıymdastyrylyp keldi. Qashyqtan oqytýdyń artyqshylyǵy kóp dep oılaımyn. Óıtkeni tyńdaýshylar tobyn ornalastyrý úshin oryn tabý qajet. Kóbi jumys istegendikten kýrsqa kelip júrýge ýaqyt tappaıdy, sol sebepti topta az ǵana adam bolatyn. Al endi qazaq tilin meńgerem deýshiler úıinde, jumysta bolsyn, ózderine yńǵaıly ýaqytta sabaqty tyńdaı alady. Jalpy mundaı kýrs qajet, bizge ony uıymdastyrýdy surap jıi habarlasady», - deıdi Álııa Beısenova.

Byltyr qazaq tili kýrstary dástúrli formatta uıymdastyryldy. Mamannyń aıtýynsha, 6 top qurylyp, Petropavldyń 70 turǵyny qatysty.