Petropavlda qarǵyn sý úılerge kire bastady
PETROPAVL. KAZINFORM – Petropavlda qardyń kúrt erýinen qarǵyn sý jeke turǵyn úılerge kirip jatyr. Ótken táýlikte oblys ortalyǵynyń 109 – biryńǵaı baılanys ortalyǵyna kómek suraǵan 119 habarlama túsken.
Úılerine sý kirgen turǵyndar beınejazbalardy áleýmettik jelige júktep jatyr. Máselen Petropavldaǵy Permınov kóshesindegi úıge sý eki saǵat ishinde kirgen.
Pýgachev kóshesindegi úı turǵyndary sý sorǵysh mashınany 5 saǵattan beri kútip, kómek bolmaǵandyqtan amalsyz áleýmettik jelige salǵan.
91 jastaǵy eńbek ardageri de úıinde rezeńke etik kııýge májbúr. Mundaı beınejazbalar kóp.
Soltústik Qazaqstan oblysy Tótenshe jaǵdaılar departamenti baspasóz qyzmetiniń málimetinshe, ótken táýlikte qarǵyn sý 1-5 sm shamasynda 10 úıge kirgen. Sý sorǵyzý jumystaryna vedomstvonyń jeke quramynan 40 adam jáne 10 tehnıka jumyldyryldy. Nátıjesinde 1 myń 223 tekshe metr sý shyǵaryldy.
«Ótken táýlikte jalpy oblys boıynsha 22 myń tekshe metrge jýyq sý arnaıy tehnıkamen soryldy. Qys bastalǵaly SQO eldi mekenderinen 1 mln 885 myń tekshe metr qar shyǵaryldy. Bul ótken jyldyń osy aralyǵymen salystyrǵanda 3 ese kóp», - deıdi departamenttiń baspasóz hatshysy Evgenıı Jýravlev.
Petropavl qalalyq ákimdigi baspasóz qyzmetiniń málimetinshe, keshe kúndiz jáne búgin túnde biryńǵaı baılanys ortalyǵyna 119 habarlama túsken. Sonyń 12-sinde turǵyndar úılerine sý kirgenin aıtqan.
Petropavlda qarǵyn sýmen kúreske 105 adam, 60 arnaıy tehnıka jáne 40 motopompa tartyldy.
