Petropavlda ınternet alaıaqtyqtyń jańa tásili paıda boldy
Soltústik Qazaqstan oblysy Polıtsııa departamenti baspasóz qyzmetiniń málimetinshe, 10 aqpan kúni Petropavl turǵynyna belgisiz bireý qońyraý shalyp, ózin Halyk Bank-tiń ókili retinde tanystyrǵan. Ol belgisiz adam onyń atyna 4 mln teńgege nesıe resimdemekshi bolyp jatqanyn aıtqan. Petropavldyq áıel senimsizdik tanytqannan keıin, alaıaq WhatsApp messendjeri arqyly nesıeniń kúshin joıý týraly «shart» joldaǵan. Zardap shegýshige PDF-sýret naǵyz qujat sııaqty kóringen, banktiń logotıpi de bolǵan.
Qylmyskerge sengen áıel óziniń esep shotyna jasalǵan qolsuǵýshylyqty toqtatý úshin 4 mln teńgege nesıe resimdep bergen. Aqsha qarajatyn «saqtandyrý shotyna» aýdarǵan, al túsken aqshany alaıaq óz keregine jaratqan. Jábirlenýshi «shartta» óziniń aty-jóni kórsetilmegenin keıin ǵana baıqaǵan. Alaıaqtyń qurbanyna aınalǵanyn túsingen ol, polıtsııaǵa júgindi.
«Polıtsııa qyzmetkerleriniń ınternet alaıaqtyqtyń aldyn alýǵa qatysty júrgizgen jumystary óz nátıjesin berip jatyr. Adamdar qaýip týraly habardar. Degenmen, qylmyskerler adamdardyń senimine kirý úshin jańa aıla-amaldardy oılap tabady. Olardyń maqsaty – adamdardyń jeke qupııa málimetterin bilip alyp, qarajatyna qol jetkizý nemese olardyń attaryna nesıe resimdeý. Qandaı jaǵdaı bolmasyn, bógde adamǵa qupııa málimetterdi, pın-kodty, sms-habarlamammen keletin bir rettik qupııa sózdi aıtýǵa bolmaıdy. Telefon arqyly tanys emes tulǵalarmen qarjy operatsııalaryn júrgizýge bolmaıdy. Eger qarajatyńyzdyń qaýipsizdigi týraly kúmándansańyz, bank fılıalyna baryńyz. Eger «bank qaýipsizdigi qyzmetinen qońyraý» tússe, áńgimeni dereý doǵaryńyz, bul – alaıaqtar», - deıdi Petropavl qalasy polıtsııa basqarmasynyń bastyǵy Jandos Muqatov.
