Petropavlda ıesiz jatqan 300 saıajaı ýchaskesi qala turǵyndaryna tegin berildi

PETROPAVL. QazAqparat – Petropavlda baý-baqsha qaýymdastyqtarynyń tóraǵalarymen kezdesý uıymdastyrylyp, saıajaıshylar úshin ózekti máseleler kóterildi, dep habarlaıdy QazAqparat tilshisi.

Petropavl ákimi Bolat Jumabekovtiń málimetinshe, oblys ortalyǵy aýmaǵynda 173 baý-baqsha seriktestigi bar. Byltyr júrgizilgen tekserý jumysy barysynda memlekettik menshikke 300 ýchaske qaıtaryldy, olar ótinish jazǵan qala turǵyndaryna tegin úlestirilgen.

Budan basqa 700 ýchaske ıesiz jyljymaıtyn múlik retinde esepke alyndy, bul saıajaılar bir jyl merzim ótkennen keıin sot tártibimen kommýnaldyq menshikke qaıtarylady.

«Kezdesý barysynda baǵbandar saıajaı maýsymy bastalysymen kireberis joldardy jóndeý jáne tegisteý qajettigin aıtty. Sonymen qatar, baý-baqsha seriktestikterine avtobýstar jiberip, elektr jáne sýmen jabdyqtaý, qosymsha beınekameralar ornatý, qoqys shyǵarý, nóser kárizderin tazartý sııaqty máseleler talqylandy», - deıdi qala ákimi.

Petropavlda 96 baý-baqsha seriktestigi sýmen qamtamasyz etilgen. Sý arnaıy keste boıynsha beriledi. Al 90 seriktestikke jaryq tartylǵan. Maýsym bastalar aldynda saıajaıǵa kireberis joldardy greıderleý júrgiziledi. Bıyl bekitilgen kestege sáıkes, 19 baý-baqshada joldar jónge keltirilmek.

Sondaı-aq, qala ákimdigi baǵbandardyń eskertýleri men usynystaryn eskere otyryp, avtobýs baǵyttarynyń qozǵalys kestesin ázirledi.

Saıajaıǵa baratyn avtobýstar 1 mamyrdan bastap jolǵa shyǵyp, 30 qyrkúıekke deıin júredi. 13 baý-baqsha baǵytyn qamtymaq.