Tramp Garvardtan 1 mlrd dollar kóleminde ótemaqy talap etedi

ASTANA. KAZINFORM – AQSh prezıdenti Donald Tramp óz ákimshiliginiń bul mekememen jalǵasyp jatqan daýy aıasynda Garvard ýnıversıtetinen 1 mlrd dollar kóleminde ótemaqy tóleýin talap etetinin jarııalady.

Bul jańalyq New York Times gazeti AQSh prezıdent ákimshiliginiń ýnıversıtetpen kelissóz kezinde 200 mln dollar tóleý talabynan bas tartýǵa májbúr bolǵany týraly habarlaǵannan keıin shyqty.

Dúısenbi kúni keshke Tramp bul oqıǵa týraly Truth Social-daǵy jazbasynda eske salyp, Garvardty «The New York Times gazetine máni joq materıaldardy brip jatyr» dep aıyptady.

- Óziniń antısemıttik kózqarasymen tanymal Garvard ýnıversıteti osy kúni quryp bitýge aınalǵan The New York Times basylymyna ne bolsa sony shyǵaratyn bolǵan. Garvard birazdan beri ózine laıyqsyz áreketterge baryp júr. Olar kásibı daıyndyqtyń kúrdeli tujyrymdamasyn engizbek boldy, alaıda ony talapqa saı emes dep qarsy shyqty, al bizdiń kózqarasymyzsha bul júıe tıimsiz. Bul bar bolǵany 500 mln dollarlyq iri ótemaqy tóleýden jaltarý. Shyndap kelgende bul soma olardyń osy ýaqytqa deıin istep kelgen zańsyz áreketteri úshin áldeqaıda kóp bolýy kerek edi. Bul azamattyq emes, qylmystyq is bolýy kerek. Garvardqa buǵan tózý kerek bolady. Qalaı bolǵan kúnde de bul is ádilettilik ornaǵansha jalǵasatyn bolady, -dep jazdy Aq úıdiń basshysy.

Tramp ákimshiliginiń ókilderi Garvardty Palestınany qoldaıtyn narazylyqtar kezinde antısemıtızmge qarsy sharalardy tıisti túrde qabyldamaǵany úshin aıyptap otyr. Alaıda ýnıversıtet bul aıyptaýdy joqqa shyǵardy.

Garvard ýnıversıteti Aq úıdiń amerıkalyq ýnıversıtetterde «progressıvti» jáne «radıkaldy solshyl» ıdeologııalardy joıý naýqanynyń negizgi nysanalarynyń birine aınaldy, dep jazdy BBC.

Ótken jyldyń sáýirinde Tramp Garvard ýnıversıtetine bólingen zertteý granttarynyń shamamen 2 mlrd dollaryn qaıtaryp alyp, federaldy qarjylandyrýdy toqtatty.

Ýnıversıtet bul qadam úshin Tramp ákimshiligin sotqa berip, eshbir úkimet «jekemenshik ýnıversıtetterde ne oqyta alatynyn, kimdi qabyldap, jumysqa ala alatynyn nemese qandaı zertteý salalaryn zertteı alatynyn belgilemeýi kerek» dep málimdedi.

Keıin AQSh federaldy soty prezıdent Donald Tramp ákimshiliginiń Garvard ýnıversıtetin federaldy zertteý granttarynan aıyrý týraly sheshimin joıdy.