Petropavlda Esil ózeni tası bastady, jaǵdaı baqylaýda

PETROPAVL. KAZINFORM – Soltústik Qazaqstan oblysynda sý tasqynynyń birinshi tolqyny ótip jatyr.

SQO Tótenshe jaǵdaılar departamenti memlekettik órt baqylaý basqarmasynyń bastyǵy Aslan Ahmetjanovtyń aıtýynsha, óńirde sý tasqynynyń alǵashqy tolqyny erigen qar sýynyń jınalýyna baılanysty ótedi. Bıyl Sergeev sý qoımasynda bógettiń jotasynan asyp-tógilýdiń maksımaldy kórsetkishi 97 sm boldy. Byltyr ol 425 sm-ge deıin kóterilgen edi. Ekinshi tolqyn aldaǵy 10 kún ishinde Aqmola oblysynan óńirge jetpek. Boljam boıynsha, byltyrǵy jaǵdaı qaıtalanbaıdy. 

- Petropavl sý qoımasyndaǵy sý deńgeıi 794 sm-ge jetti. 8 saǵattyń ishinde 52 sm-ge kóterildi. «Ýchıtel-1», «Ýchıtel-2» saıajaı qoǵamdastyqtarynan 19 adam, onyń ishinde 4 bala qaýipsiz jerge evakýatsııalandy. Olardyń basym kópshiligi týystaryn panalady. Eki adam ǵana jataqhanaǵa ornalastyrylyp, tamaqpen, qajetti tósek-orynmen qamtyldy, - deıdi Aslan Ahmetjanov. 

Mamannyń aıtýynsha, jylda 5 myńǵa jýyq saıajaı ýchaskesi kóktemde sý astynda qalady. Olar «Lesovod», «Ýchıtel-1», «Ýchıtel-2» saıajaı qoǵamdastyqtarynda jáne Zarechnyı kentiniń mańynda ornalasqan. Sý kelip jatyr. «Chelıabi-Novosibir» halyqaralyq mańyzy bar avtojoldyń 528 km sý basýy yqtımal.

Petropavl ákimdigi tasqynnan zardap shekkenderge eki evakopýnkt ázirledi. Qajet bolǵan jaǵdaıda taǵy bes mektepke zardap shekkender ornalastyrylady. 

- Ótken aptada ákim saıajaı qoǵamdastyqtarynyń tóraǵalarymen kezdesip, olarǵa barlyq jaǵdaıdy túsindirdi jáne jergilikti atqarýshy organdar tarapynan kórsetiletin kómek týraly habarlady. Petropavlda 107 saıajaı qoǵamdastyǵy bar, 28 myń saıajaı ýchaskesi tirkelgen. Onyń 7,5 myńy Esil ózeniniń saǵasynda ornalasqan. 

Qazirgi tańda turǵyndardyń zatyn qoıýǵa arnalǵan qoıma jumys istep tur, onyń kúzeti bar. Qaýipti aımaqta ornalasqan barlyq turǵyndar óz múlikterin sol jerge jetkize alady. Sonymen qatar, múlikti tasymaldaý boıynsha ákimdik kómek kórsetetin bolady, - deıdi qala ákiminiń baspasóz hatshysy Ásem Aıtýlova. 

Qazir oblysta aýdandyq mańyzy bar eki joldy sý basqan, olar: Shal aqyn jáne Aqjar aýdandarynda. Bul ýchaskelerde mamandar táýlik boıy kezekshilik atqaryp jatyr. Sonyń ishinde polıtsııa qyzmetkerleri avtokólikterdiń qaýipsiz ótýi úshin jumys istep jatyr. 

Buǵan deıin SQO-da drondar naqty ýaqyt rejıminde sý tasqynyn baqylaýǵa alǵanyn jazǵan edik.