Petropavlda esirtki zerthanasyn ashqan 20 jastaǵy jigit ustaldy

PETROPAVL. QazAqparat – Petropavlda esirtki zerthanasyn quryp, sıntetıkalyq elitkish zatty óndirip, satyp kelgen 20 jastaǵy jigitke qatysty tergeý jumystary júrip jatyr, dep habarlaıdy QazAqparat tilshisi.

Soltústik Qazaqstan oblysy polıtsııa departamenti baspasóz qyzmetiniń málimetinshe, Petropavldyń 20 jastaǵy turǵyny mamyr aıynda ustalǵan.

Ony tintý kezinde ósimdik tektes zat salynǵan 8 polımer túıinshek tabylǵan.

Taǵy 52 túıinshek pen suıyqtyq quıylǵan eki ydys Haltýrın kóshesi boıyndaǵy turǵylyqty mekenjaıynan tabyldy.

Saraptama túıinshekterdegi zattyń sıntetıkalyq esirtki «spaıs» ekenin kórsetti. Al qalǵany - ony daıyndaýǵa arnalǵan prekýrsorlar bolǵan.

Tárkilengen esirtkiniń sany 200 rettik dozaǵa jýyq, esirtki zatynyń jalpy salmaǵy shamamen 8 gramm, ol asa iri mólsherge jatady.

Jigittiń úıinen respıratorlar, gramdyq tarazylar, ólsheýish kolbalar men sıntetıkalyq esirtkini daıyndaýǵa arnalǵan basqa da qurylǵylar tárkilendi.

Kúdiktiniń aıtýynsha, esirtkini ol jeke paıdalaný úshin saqtaǵan. Qazir sıntetıkalyq esirtkini óndirý jáne ótkizý faktisi boıynsha sotqa deıingi tergep-tekserý júrgizilip jatyr.

«Kúdikti qamaýǵa alyndy. QR Qylmystyq kodeksiniń «Esirtki, psıhotroptyq zattardy, sol tektesterdi ótkizý maqsatynda zańsyz daıyndaý, qaıta óńdeý, ıemdený, saqtaý, tasymaldaý, jóneltý ne ótkizý» 297-baby 3-bóligi boıynsha sotqa deıingi tergep-tekserý júrgizilip jatyr. Baptyń sanktsııasy 15 jylǵa deıingi merzimge bas bostandyǵynan aıyrý túrindegi jazany kózdeıdi», - deıdi SQO PD Esirtki qylmysyna qarsy is-qımyl basqarmasynyń bastyǵy polıtsııa polkovnıgi Jandos Basybaev.