Petropavlda esirtki taratýshy boıjetken 11 jylǵa sottaldy

PETROPAVL. QazAqparat – Petropavlda esirtki taratýdy kásip etken boıjetken 11 jylǵa sottaldy jáne endi ol nashaqorlyqtan májbúrli túrde emdeletin bolady, dep habarlaıdy QazAqparat tilshisi.

Soltústik Qazaqstan oblysy polıtsııa departamenti baspasóz qyzmetiniń málimetinshe, Petropavlda esirtkini belgili bir orynǵa jasyryp, taratyp júrgen 22 jastaǵy qyzǵa qatysty sot úkimi zańdy kúshine endi. Boıjetkennen aqpan aıynda 5 grammǵa jýyq, ıaǵnı asa iri kólemde sıntetıkalyq esirtki tárkilengen bolatyn. Polıtseıler ony aqpan aıynda ustaǵan. Sot úkimine sáıkes ol 11 jylǵa bas bostandyǵynan aıyrý jazasyna kesildi. Sondaı-aq jazany óteý orny boıynsha esirtkilik táýeldilikten májbúrli túrde emdeletin bolady.

«Qazirgi problema – nashaqorlardyń, qylmyskerlerdiń ortasha jasynyń jasarýy. Jastar «jeńil aqshaǵa» qyzyǵady. Bir qaraǵanda esirtki jasyrýdyń túk qıyndyǵy joq. Taratýshylar esirtkini qoldanatyn adamnyń densaýlyǵyna zııan keltirilip, ólim qushatyny týraly oılanbaıdy. Esirtkini taratqany, satqany úshin zańnamamen qatań jaza kózdelgen. Bıyl SQO-da esirtkini arnaıy orynǵa jasyryp, taratqan 22 adamǵa sot úkimi shyǵaryldy. Olardyń 12-siniń jasy 25-ten aspaıdy. Qylmyskerler orta eseppen 10 jyldan 12 jylǵa deıin bas bostandyǵynan aıyryldy», - deıdi SQO Polıtsııa departamenti Esirtki qylmysyna qarsy is-qımyl basqarmasynyń bastyǵy Jandos Basybaev.

Jyl basynan beri oblysta 146 esirtki qylmysy anyqtaldy, onyń ishinde 46 ótkizý faktisi. Qazirgi tańda olar boıynsha sotqa deıingi tergeý amaldary júrgizilip jatyr. Zańsyz aınalymnan 333 kılogramm túrli esirtki, onyń ishinde bir jarym kılogramm sıntetıkalyq esirtki tárkilendi.

Foto: polisia.kz