Petropavlda eki kólik jeke turǵyn úıge soqtyǵysty
PETROPAVL. KAZINFORM — Petropavldaǵy Jumysshy kentinde úsh kún ishinde eki jol-kólik oqıǵasy bolyp, eki kólik jeke turǵyn úıge kirip ketti.
Alǵashqy jol-kólik oqıǵasy 12 aqpanda Panfılov kóshesinde boldy.
Soltústik Qazaqstan oblystyq polıtsııa departamenti baspasóz qyzmetiniń málimetinshe, KAMAZ júk kóliginiń 64 jastaǵy júrgizýshisi rólge ıe bola almaı, turǵyn úıdiń qabyrǵasyna soǵylǵan.
— Zardap shekkender joq. Júrgizýshi mas bolmaǵan. Oǵan qatysty jol qozǵalysy erejelerin buzý, múlikke zalal keltirý faktisi boıynsha ákimshilik materıal jınaldy, — delingen habarlamada.
Ekinshi jaǵdaı 14 aqpanda osy Jumysshy kentindegi Ýkraınskaıa kóshesinde tirkeldi.
Aldyn ala derekter boıynsha, Subaru Legacy avtokóligi turǵyn úıge soǵylyp, ishine jartylaı kirip ketken. Júrgizýshi medıtsınalyq kómekke júgindi. Basqa zardap shekkender joq.
Qazirgi ýaqytta polıtsııa qyzmetkerleri oqıǵanyń barlyq mán-jaıyn anyqtap jatyr. Tekserý nátıjesi boıynsha protsessýaldyq sheshim qabyldanady.
Buǵan deıin Shymkentte avtobýs júrgizýshisi jeńil kólikti qasaqana qaqqanyn jazǵan edik.