Petropavlda bir aptada 330 adam jaraqat aldy, arasynda úsik shalǵandar da bar

PETROPAVL. KAZINFORM — Petropavldaǵy kópbeıindi qalalyq jedel medıtsınalyq kómek aýrýhanasyna júgingenderdiń 139-y kóshede jaraqat alǵan. 

Petropavl qalalyq kópbeıindi jedel medıtsınalyq kómek aýrýhanasynyń málimetinshe, dáriger kómegine júgingenderdiń 164-i turmystyq, qalǵandary kóshede jaraqat alǵan. Olardyń 30-y birden statsıonarǵa qabyldandy.

Sonyń ishinde 95 jaǵdaıda adamdar negizinen qol-aıaǵyn syndyrǵan. 112 adam aýyr soqqy alyp, zaqymdanýlermen kelgen. Sińirin sozǵan 58 turǵynǵa jáne kúıik alǵan 5 adamǵa tıisti kómek kórsetildi.

Aıazǵa baılanysty úsik alý jaǵdaılary azaımaı otyr. 19-26 qańtar aralyǵynda 9 adam dene múshelerin úsitip alǵan. Olardyń tórteýi aýrýhanaǵa jatqyzyldy.

Mamandardyń aıtýynsha, turǵyndardyń úsik alýyna kóp jaǵdaıda spırttik ishimdik ishýi sebep.

SQO Polıtsııa departamentiniń málimetinshe, Mamlıýt aýdanyndaǵy aýyldardyń biriniń turǵyny otyz gradýs aıazda úsip qala jazdady. Ony Mamlıýt aýdandyq polıtsııa bóliminiń kezekshisi beınebaqylaý kameralary arqyly Mamlıýtkanyń Jumysshy kenti mańynan baıqap qalǵan. Ol bul týraly ýchaskelik polıtsııa ınspektorynyń kómekshisine habarlap, nátıjesinde er adamdy qar qursaýynan polıtsııa qyzmetkerleri men jedel járdem qyzmetkerleri aman-esen alyp shyqty.

39 jastaǵy er adam spırttik ishimdikti shamadan tys tutynýǵa beıim, ol qazir medıtsınalyq mekemede em alyp jatyr, jaǵdaıy turaqty.

Buǵan deıin Petropavlda úıden shyǵyp ketken zeınetker áıel aıazda úsik shalyp, mert bolǵanyn jazǵan edik.