Petropavlda bas qala - Nur-Sultannyń qurmetine aýqymdy shara ótti
Petropavl qalasynyń tańdaýly óner ujymdary oblys ortalyǵynyń bas alańynda kontsert qoıdy. Oǵan elordanyń Nur-Sultan atalýyn qoldaǵan soltústiqazaqstandyqtar - ardagerler, qoǵam qaıratkerleri, jastar uıymdarynyń ókilderi, Qazaqstan halqy Assambleıasynyń músheleri, sportshylar, kásipkerler, qala turǵyndary jınaldy.
«Qazaqstan astanasy - Qazaqstan táýelsizdiginiń belgisi, jemisi der edim. Ol barlyq álemge týǵan halqy qoldaǵan Uly adamnyń qandaı uly isterge qabiletti ekendigin kórsetti. Elbasy, Qazaqstannyń Tuńǵysh Prezıdenti Nursultan Ábishuly Nazarbaev el táýelsizdiginiń bastaýynda turdy. Memlekettiń qalyptasýyna orasan eńbegi sińdi. Basqa elderdiń qyzyǵýshylyǵyn týdyrǵan, respýblıkadaǵy ulttardyń basyn biriktirgen Qazaqstan halqy Assambleıasyn - biregeı ınstıtýtty quryp, nátıjesinde el aýmaǵynda bir de bir etnosaralyq janjal bolǵan joq. Búginde Qazaqstan álem kartasynda turaqtylyqtyń «aralyna» aınalǵan. Munyń bári - bizdiń Tuńǵysh Prezıdentimizdiń kóregen saıasatynyń jemisi», - deıdi sharaǵa kelgen «Dýslyk» tatar-bashqurt etnomádenı ortalyǵynyń tóraǵasy, Petropavl qalalyq 21-orta mekteptiń dırektory Naıl Salımov.
Naıl Kamılevıchtiń pikirinshe, biz qazir tarıhı kezeńde, úlken ózgerister zamanynda ómir súrip jatyrmyz.
«Bizdiń Elbasymyzǵa qandaı qurmet kórsetsek te laıyq dep oılaımyn. Al Astana onyń tól balasy ispettes. Shaǵyn ǵana qaladan álem tanyǵan Astanany jasady. Sondyqtan bul sheshimdi qoldaımyn», - deıdi Naıl Salımov.
Astana ataýyn ózgertý usynysyn SQO boıynsha «Jas Otan» partııasy jastar qanatynyń ókilderi de qoldaýda. Partııanyń jastar qanatynyń tóraǵasy Abylaıhan Qaırollaevtiń aıtýynsha, Astana mádenıet, sport jáne basqa salalarda Tuńǵysh Prezıdent Nursultan Nazarbaevtyń arqasynda tanymal brendke aınaldy.
«Elordany Nur-Sultan dep ózgertý nátıjesinde elimizdiń tanymaldyǵy odan saıyn arta túsedi dep esepteımin. Óıtkeni, bizdiń Elbasy - álem tanyǵan, qurmetteıtin saıasatker. Bul eldiń damýyna taǵy bir túrtki bolmaq», - deıdi Abylaıhan Qaırollaev.
Merekelik kontsert barysynda vıktorına oınatylyp, sharaǵa qatysýshylar salt-dástúrge qatysty suraqtarǵa jaýap berdi. Jeńimpazdar baǵaly syılyqtarmen marapattaldy.
